Հովանաւորութեամբ՝ Բերիոյ Հայոց Թեմի Բարեջան Առաջնորդ Գերշ. Տէր Շահան Սրբ. Արք. Սարգիսեանի, կազմակերպութեամբ՝ Համազգայինի Նիկոլ Աղբալեան մասնաճիւղի վարչութեան եւ «Շուշի» պարարուեստի դպրոցի յանձնախումբին, Կիրակի, 4 Հոկտեմբեր 2015-ին, երեկոյեան ժամը 6:30-ին, Հալէպի «Գ. Եսայեան» սրահին մէջ տեղի ունեցաւ Համազգայինի Նիկոլ Աղբալեան մասնաճիւղի «Շուշի» պարարուեստի դպրոցի սաներու պարային ելոյթը: Այս մասին կը յայտնէ Perio news-ը:

Հանդիսութիւնը սկսաւ մէկ վայրկեան յոտնկայսով եւ Սուրիոյ ու Հայաստանի քայլերգներով:
Ձեռնարկի բեմավարուհին էր ընկհ. Բալիկ Աւագեանը, իրեն կ՛ընկերակցէին փոքրիկներ՝ Վանա Պարմաքսզեան եւ Մեղրիկ Մելքոնեան:
Ապա բեմ բարձրացան «Շուշի» պարարուեստի դպրոցի 64 սաները:

Ա. մասին մէջ տեղի ունեցաւ Կարմիր գլխարկիկ հեքիաթի պարային ներկայացումը:

Բ. Մասին մէջ յաջորդաբար ներկայացուեցաւ. Ազգագրական, Սպանական, Չաչա, Վալս, Ռուսական, Արաբական, Շալախօ, Մաութինի եւ Ֆինալ պարերը:
«Շուշի» մանկապատանեկան պարախումբի գեղարուեստական ղեկավարներ՝ Պետիկ Գրքեսերեան եւ Հայկազ Պէթէրեան բծախնդիր եւ կարգապահ մօտեցումով կրցած էին փոքրիկներուն մէջ ներթափանցել մշակոյթի եւ յատկապէս պարային արուեստի հեզաճկուն, արնական եւ ճկունութեան գաղտնիքները:
Գեղեցիկ բեմայարդարումը կատարած էր ընկ. Յարութ Լախոյեանը:
«Շուշի» պարարուեստի դպրոցի սաներուն կատարումները արժանանացաւ ներկաներուն հպարտալի ծափահարութեան:

Արդարեւ, այս տեսակի աշխատանքներ յատկապէս Հալէպի պատերազմի օրերուն իրագործելը մեծ հերոսութիւն կը պահանջէ, եւ այս հերոսութեան ամէնէ մեծ բաժինը վստահ կ՛երթայ պարարուեստի դպրոցի յանձնախումբի ամէն մէկ անդամին, որոնք քուլիսներու ետին ամիսներէ ի վեր միայն աշխատեցան լաւագոյնը ներկայացնելու համար: Ինչպէս, որ ձեռնարկի յայտագրին վրայ Վարչութեան Խօսքին մէջ կը կարդանք. «Մենք կը հաւատանք, որ մշակոյթը հաստատ կը մնայ երբ միութեան ոգիով, համայնօրէն եւ բծախնդիր աշխատինք: Մենք կը հաւատանք, որ գաղութիս ժողովուրդը Համազգայինի ոլորտին մէջ քաշելով կրնանք թէ զիրենք զբաղ պահել մշակոյթով որ կը թեթեւցնէ ծանր առօրեան եւ թէ զիրենք հեռացնել մօտալուտ օտարացումէ: Մենք պիտի չյանձնուինք եւ տակաւին հայ մշակոյթի պահակներն ենք, կեցած իբրեւ պատուաւոր տագնապալից օրերու եւ օտար հոսանքներու դիմաց»:

�

�

�