ՏԱՀԵՇ-ի եւ Արեւելքի մէջ իսլամիստական շարժումներուն դէմ պայքարին մէջ Թուրքիոյ կողմէ տարուող երկակի խաղը դատապարտող բողոքի ցոյցը տեղի ունեցաւ Փարիզի մէջ Թուրքիոյ դեսպանատան առջեւ:

«Նուվել տ՛Արմենի» կը հաղորդէ, թէ բողոքի ցոյցը տեղի ունեցաւ 7 սեպտեմբերին, Ֆրանսայի ժամանակացոյցով երեկոյեան ժամը 6:30-ին` «Արեւելքի քրիստոնեաները վտանգի մէջ են» խումբի նախաձեռնութեամբ:

Բողոքի ցոյցը իրականացաւ Ֆրանսայի արտաքին գործոց նախարարութեան նախաձեռնութեամբ Արեւելքի քրիստոնեաներուն առջեւ ծառացած հիմնախնդիրներուն նուիրուած միջազգային խորհրդաժողովի նախօրեակին, որուն հրաւիրուած է նաեւ Թուրքիան:

Ֆրանսայի մէջ հայկական կազմակերպութիւններու խորհուրդը, որուն անդամները եւս մասնակցեցան բողոքի ցոյցին եւ անոր ընթացքին ելոյթ ունեցան, նշած են, որ Թուրքիան տեղ չունի նման խորհրդաժողովի մը մէջ: «Թուրքիան, որ մեղաւոր է հայերու եւ ասորիներու ցեղասպանութեան համար, սակայն կը հրաժարի իր կատարածը ճանչնալէ, մէկ դար անց յանցակիցն է Արեւելքի քրիստոնեաներուն, եզիտիներու եւ այլ փոքրամասնութիւններու ցեղասպանութիւններուն: Անոր կեղծ հայրենասիրութիւնը ծայրայեղական շարժումներուն դէմ պատերազմին մէջ խաբկանք է: Թրքական ռմբակոծումները հիմնականին մէջ ուղղուած են քիւրտերուն դէմ, որոնք կը պայքարին Իրաքի եւ Սուրիոյ ահաբեկչական խմբաւորումներուն դէմ: Մենք կը հերքենք եւ կը դատապարտենք Թուրքիոյ երկակի խաղը», ըսուած է Ֆրանսայի մէջ հայկական կազմակերպութիւններու համակարգող խորհուրդի յայտարարութեան մէջ:

Ֆրանսայի արտաքին գործոց նախարարութեան նախաձեռնութեամբ 8 սեպտեմբեր 2015-ին Փարիզի մէջ տեղի պիտի ունենայ միջազգային խորհրդաժողով` նուիրուած Արեւելքի քրիստոնեաներուն առջեւ ծառացած հիմնահարցերուն, մասնաւորապէս Իրաքի եւ Սուրիոյ մէջ ծաւալուող իրադարձութիւններուն: Խորհրդաժողովին պիտի մասնակցին աւելի քան 60 երկիրներու ներկայացուցիչներ, անոնց կարգին` Միացեալ Նահանգներէն, Ռուսիայէն, Իրաքէն, Սէուտական Արաբիայէն, Թուրքիայէն, ինչպէս նաեւ շարք մը միջազգային կազմակերպութիւններէն, յատկապէս ՄԱԿ-էն: Իր ֆրանսացի գործընկեր Լորան Ֆապիւսի հետ խորհրդաժողովը պիտի համանախագահէ Յորդանանի արտաքին գործոց նախարար Նասեր Ճուտեհը: Կ՛ակնկալուի, որ խորհրդաժողովին իբրեւ արդիւնք ընդունուի «Փարիզի ծրագիրը», որուն ընդմէջէն պիտի ուրուագծուին Միջին Արեւելքի քրիստոնեաներուն օժանդակութեան հիմնական ուղիները

�