Աստուածածնայ վերափոխման տօնը կանխող շաբթուան ընթացքին, Պիքֆայայի Ս. Աստուածածին վանքին մէջ տեղի ունեցան ժամերգութիւն, Ս. Գրոց սերտողութիւն, հոգեւոր լսարան, մատաղի պատրաստութիւն, այցելութիւն վեհափառ հայրապետին եւ աջահամբոյր: Ամբողջ շաբթուան մը աղօթքով, հոգեւոր եւ ուխտի տրամադրութեամբ զեղուն մթնոլորտը իր գագաթնակէտին հասաւ հանդիսաւոր Ս. եւ անմահ պատարագով, որ մատուցեց Ֆրանսայի հայոց առաջնորդ Վահան եպս. Յովհաննիսեան, շաբաթ, 15 օգոստոս 2015-ի երեկոյեան: Եկեղեցական արարողութեան նախագահեց Արամ Ա. վեհափառ հայրապետը: Պատարագի աւարտին, Արամ Ա. կաթողիկոսը, շրջապատուած միաբան հայրերով, կատարեց խաղողի եւ մատաղի օրհնութիւնը:

Լեցուն էր վանքին հսկայ բակը ուխտաւորներով: Երիտասարդութեան ներկայութիւնը տիրական էր: Հայ ժողովուրդի զաւակներուն ներկայութեամբ աւելի պայծառակերպուած էր Ս. Աստուածածին վանքը:

bi-2_8-16-15Հոգեւոր ու ազգային ապրումներով լեցուն մթնոլորտին մէջ վեհափառ հայրապետը տուաւ իր հայրապետական պատգամը ժողովուրդին: Արամ Ա. կաթողիկոսը յիշեցուց, թէ «մեր եկեղեցին աղօթքներու, շարականներու ու մեղեդիներու եւ ընդհանրապէս իր աստուածաբանութեան ճամբով այնքան բնորոշիչ կերպով ներկայացուցած է Ս. Աստուածածինը իր սրբակենցաղ կեանքով ու աստուածատուր առաքելութեամբ: Ս. Աստուածածինի անձին մէջ մեր եկեղեցին յատկապէս շեշտած է անոր մայրութիւնը, հոգեւոր ու բարոյական արժանիքները, ինչպէս նաեւ անոր դերը` իբրեւ մայր Աստուծոյ Միածին Որդւոյն: Ահա թէ ինչու Ս. Մարիամ նկատուած է առաջին սուրբը եկեղեցւոյ, եւ իբրեւ միջնորդ ու բարեխօս մեր եւ Քրիստոսի միջեւ»: Հետեւաբար, ըսաւ վեհափառ հայրապետը, «Ս. Աստուածածինի վերափոխման տօնին նշումը յիշեցում մըն է յատկապէս մեր քոյրերուն ու մայրերուն իրենց կեանքին տիպարը Ս. Աստուածածինը նկատելու: Ներկայ կեանքի պայմանները այնպիսին են, որոնք յաճախ մեզ կը մղեն մեր հոգեւոր ու բարոյական արժէքներէն հեռացումի: Ս. Աստուածածինը Աստուծոյ կողմէ ընտրուեցաւ իբրեւ տիպար կին. տիպար` հոգեւոր ու բարոյական արժէքներու իր ամուր կապուածութեամբ, տիպար` իր սրբալոյս կեանքով ու առաքինի վարքով: Մեր սպասումն է մեր մայրերէն ու քոյրերէն, որ քրիստոնէական վեհ արժէքներով լեցնեն իրենց անհատական թէ ընտանեկան կեանքը` հեռու մնալով այնպիսի կենցաղակերպերէ, որոնք մեր մէջ կը մթագնեն Ս. Աստուածածինի, ինչպէս նաեւ Ս. Աստուածածինը իրենց կեանքի հայելին դարձուցած մեր պատմութեան սրբակենցաղ մայրերուն պայծառակերպող ներկայութիւնը»:

Իր պատգամի երկրորդ բաժինին անցնելով` վեհափառ հայրապետը Ս. Աստուածածին վանքի բարեզարդման մասին ըսաւ. «Փառք Աստուծոյ շինարարական աշխատանքները աւարտած են եւ ինչպէս կը տեսնէք Ս. Աստուածածին վանքը ամբողջութեամբ պայծառակերպուած է ու դարձած լայն կարելիութիւններով օժտուած վանք: Ս. Աստուածածին վանքին օծումը կատարած եղանք, երբ 18 յուլիսին յուշարձանին ներքեւ սրբալոյս Միւռոնի օրհնութիւնը կատարեցինք բազմահազար ժողովուրդի ներկայութեան: Այս առիթով անգամ մը եւս Մեր ջերմ շնորհակալութիւնն ու բարձր գնահատանքը կ’ուզենք յայտնել մեր բոլոր բարերարներուն: Կ’աղօթենք առ Աստուած, որ վարձահատոյց ըլլայ մեր նուիրեալ զաւակներու աստուածահաճոյ ու հայակերտ բարերարութիւններուն»: Վեհափառ հայրապետը նաեւ ըսաւ, թէ` «երբ նայիք մեր պատմութեան, պիտի տեսնէք, թէ եկեղեցիներ, վանքեր, կրօնական ու մշակութային կեդրոններ եւ դպրոցներ շինուած են բարերարներով: Հայ մշակոյթն ու կրթութիւնը զարգացած են շնորհիւ բարերարներուն: Եկեղեցին պայծառացած է կոչումի գիտակցութիւն ունեցող հոգեւորականներու կողքին, ազգին ու եկեղեցւոյ նուիրուած բարերարներու գործակցութեամբ: Այսօր եւս, հայ եկեղեցին, հայ մշակոյթն ու դպրոցը, մեր ազգն ու հայրենիքը կը զարգանան, կը բարգաւաճին ու կը հզօրանան նուիրեալներու, հերոսներու, մշակներու կողքին` մեր բարերարներուն նիւթական ներդրումով: Պատի՛ւ ու յարգանք բոլոր անոնց, որոնք Աստուծոյ իրենց տուած բարիքներէն մաս մը կը տրամադրեն ազգին, հայրենիքին ու եկեղեցւոյ»:

Վեհափառ հայրապետը իր պատգամը եզրակացուց յիշեցնելով, թէ` «մեր եկեղեցին, մեր հայրենիքը եւ մեր բոլոր կառոյցները կը պատկանին մեր ժողովուրդին: Անոնց տէրն ու պահապանը ժողովո՛ւրդն է: Անոնց ծառայողները մեր ժողովուրդէն կու գան ու համարատու են մեր ժողովուրդին: Ա՛յս գիտակցութեամբ Մեծի Տանն Կիլիկիոյ կաթողիկոսութիւնը կը ծառայէ մեր ժողովուրդին: Հարիւր տարիներ առաջ գաղթական դարձած այս Սուրբ աթոռը այսօր պայծառակերպուած է իր կեանքով ու առաքելութեամբ եւ խոր գիտակցութեամբ ու բարձրագոյն աստիճանի նուիրումով կը ծառայէ մեր եկեղեցւոյ, մեր հայրենիքին ու ազգին: Նեցուկ կանգնեցէք անոր հայակերտ ու ազգօգուտ ծրագիրներուն. մասնակից եղէք անոր եկեղեցաշէն առաքելութեան: Ազգին, հայրենիքին ու եկեղեցւոյ հզօրացումը իւրաքանչիւր հայուն ու ամբողջ հայութեան հզօրացումն է»:

Ս. եւ անմահ պատարագի աւարտին հաւատացեալները հաղորդակից դառնալով Ս. Աստուածածնայ վերափոխման տօնին խորհուրդին` ստացան համայն ննջեցեալներու հոգիներուն համար օրհնուած մատաղը եւ աստուածային զոհագործումի, բարիքներու եւ բերրիութեան խորհրդանիշ հանդիսացող խաղողի այս տարուան առաջին օրհնուած ճիռերը:

Յայտնենք, որ Ուխտի օրուան պատարագը արբանեակային պատկերասփիւռի կայանով սփռուեցաւ աշխարհի բոլոր կողմերը` հայրենիքի թէ աշխարհի տարբեր ծայրամասերուն ապրող ժողովուրդի զաւակները եւս հաղորդակից դարձնելով հոգեթով արարողութիւններուն:

�