Բարձրաստիճան պաշտօնեաները եւ անոնց հետ կապ ունեցող անձերը, որոնք չեն կրնար հիմնաւորել, թէ ինչպէ՛ս հարստացած են, յառաջիկային պիտի ենթարկուին քրէական պատասխանատուութեան: Այս առնչութեամբ նախագիծ վաւերացուած է: Այս մասին կը գրէ Սարգիս Յարութիւնեան:

18 նոյեմբերի կառավարութեան նիստին համաձայնութեան արժանացաւ քրէական օրէնսգիրքին մէջ լրացում կատարելու վերաբերող նախագիծը, ըստ որուն, եթէ յայտարարագիր ներկայացնող պաշտօնեայի կամ անոր ընտանիքի անդամին կարողութիւնը մէկ տարուան ընթացքին առնուազն հինգ միլիոն դրամով աւելի եղած է, քան այդ անձին օրինական եկամուտն է, եւ այդ անձը չի կրնար հիմնաւորել, թէ ինչպէ՛ս գոյացած է այդ եկամուտը, ապա բարձրաստիճան պաշտօնեան կամ անոր հետ կապ ունեցող անձը պիտի ենթարկուի քրէական պատասխանատուութեան:

Այլ նախագիծով մը արդարադատութեան նախարարը առաջարկած է «Հանրային ծառայութեան մասին» օրէնքին մէջ կատարել փոփոխութիւն, որով բարձրաստիճան պաշտօնեաներն ու անոնց ընտանիքներուն անդամները պարտաւոր պիտի ըլլան փոխառութիւններէ ստացած վճարումները, դրամական նուիրատուութիւնները, այլ եկամուտները, որոնք երկու միլիոն դրամը կը գերազանցեն, անկանխիկ ընելու: Այս նախագիծին եւս համաձայնութիւն տուաւ գործադիրը: Այս փոփոխութիւնները օրէնքի ուժ պիտի ստանան խորհրդարանին մէջ ընդունուելէ եւ հանրապետութեան նախագահին կողմէ ստորագրուելէ ետք:

Բազմաթիւ են հայաստանցի այն բարձրաստիճան պաշտօնեաները, որոնք իրենց աշխատավարձը տասնեակ, հարիւրաւոր անգամներով գերազանցող եկամուտներ յայտարարագրած են` զանոնք ներկայացնելով իբրեւ հանրութեան անյայտ անձերու կողմէ կատարուած նուիրատուութիւններ կամ տրուած փոխառութիւններէն ստացուած եկամուտ:

18 նոյեմբերին կառավարութեան մէջ այս նախագիծերու ընդունումը բացատրուած է փտածութեան դէմ պայքարը աւելի արդիւնաւէտ դարձնելու անհրաժեշտութեամբ:

Նոյն շրջագիծին մէջ, Հայաստանի փոխվարչապետ, միջազգային տնտեսական համարկման եւ բարեփոխումներու նախարար Վաչէ Գաբրիէլեան` պատասխանելով «168 ժամ»-ի հարցումին, թէ ինչո՞ւ անշարժ գոյքի համար չէ ներդրուած շքեղութեան հարկ, որ որոշ չափով օրինական դաշտ պիտի բերէ ապօրինի հարստացման առնչուող հարուստներուն դղեակները, ըսած է, որ մինչեւ յաջորդ տարուան ապրիլ տեղի ունենալիք ընտրութիւնները կառավարութիւնը գոյքահարկի վերաբերեալ նոր մօտեցումներ պիտի ներկայացնէ:

Միւս կողմէ, իշխանութիւնները պիտի քննարկեն զոհուած եւ վիրաւորուած զինուորներու հատուցման համար ձեւաւորուելիք հիմնադրամին պարտադիր վճարումները կամաւոր դարձնելու առաջարկը: Ազգային ժողովին մէջ խորհրդարանական ճեպազրոյցներու ծիրին մէջ լրագրողներուն հետ զրուցելով, այս տեղեկութիւնը փոխանցած է Ազգային ժողովի Հայաստանի հանրապետական կուսակցութեան խմբակցութեան ղեկավար Վահրամ Բաղդասարեան:

«Մենք առաջարկ ունինք այդ պարտադիր դրոյթը կամաւոր դարձնելու, եւ ես կը կարծեմ, որ ատիկա բնական մօտեցում է, որ եթէ կայ մէկը, որ չ՛ուզեր վճարել, անոր չպարտադրուի: Կը կարծեմ, որ այդ առաջարկը կը քննարկուի, քանի որ բոլոր առաջարկները ենթակայ են քննարկման», ըսած է Բաղդասարեան:

Լրագրող մը հարցուցած է, թէ հաւանակա՞ն է, որ օրէնքի նախագիծի առաջինէն երկրորդ ընթերցման դրութեան մէջ փոփոխութիւններ ըլլան եւ պարտադիր բաղադրիչը վերցուի նախագիծէն. Վահրամ Բաղդասարեան պատասխանած է, թէ կայ նման առաջարկ, որ պիտի քննարկուի:

Կառավարութեան աշխատանքներու ծիրին մէջ, 18 նոյեմբերին տեղի ունեցած նիստին գործադիրը, ի թիւս այլ հարցերու, որոշում տուած է Սուրիոյ ազգութեամբ հայ քաղաքացիներուն կողմէ 1 յուլիս 2012-էն ետք Սուրիայէն Հայաստան ներածուած ինքնաշարժներուն մաքսային վճարումներուն եւ օրէնքով սահմանուած մաքսային մարմիններուն կատարուելիք վճարումներուն համար կառավարութեան պահեստային ֆոնտէն գումար յատկացնել Հայաստանի Պետական եկամուտներու կոմիտէին:

�

�