Ապօրինաբար Պաքուի բանտերուն մէջ պահուող Արցախի նախկին պետական նախարար Ռուբէն Վարդանեան 7 մարտին ընտանիքին միջոցով ձայնային ուղերձ փոխանցած է` հեռաձայնային հաղորդակցութեան ընթացքին խնդրելով ձայնագրել իր ձայնը եւ հրապարակային դարձնել զայն: Ուղերձին մէջ ան յատկապէս խաղաղութեան կոչ կ՛ուղղէ` հիմնուած մարդկային հիմնարար արժէքներու եւ արժանապատուութեան վրայ:

«Նախ եւ առաջ, կը ցանկամ բոլորիդ շնորհակալութիւն յայտնել` միտքերով, աղօթքներով եւ նամակներով ինծի աջակցելու, այստեղ կատարուողին նկատմամբ անտարբեր չըլլալու համար: Ես այդ կը զգամ, ու այդ ինծի ուժ կու տայ: Միտքը նիւթական է: Ես լաւ վիճակի մէջ եմ, ամուր եմ, առողջութիւնս բնական է, ես ինծի հետ հաշտ եմ ու ոգիով ուժեղ, ինչպէս երբեք: Կ՛ուզեմ ներողութիւն խնդրել իմ սիրելի կնոջմէս, իմ ընտանիքէս, բոլոր հարազատներէս ու մերձաւորներէս, որոնց իմ այս որոշումով ցաւ ու յուզմունք կը պատճառեմ: Բայց դուք գիտէք, որ մեզմէ իւրաքանչիւրը իր ճանապարհը ունի, եւ ես ինծի համար այս ճանապարհը ընտրած եմ: Մեր ճակատագիրները կանխորոշուած են Աստուծոյ կողմէ, իսկ ճանապարհները միշտ մենք կ՛ընտրենք: Եթէ նոյնիսկ կը հրաժարինք մեր ընտրութենէն, այդ մեր փոխարէն միշտ կ՛ընէ մէկ ուրիշը», ըսած է Ռուբէն Վարդանեան:

Վարդանեան ընդգծած, որ իր այս որոշումը ոչ մէկ ձեւով պայմանաւորուած է իրմով , իր վիճակով կամ մեկուսարանին մէջ իր պայմաններով, ինչպէս անցեալ անգամ, երբ 20 օր շարունակ, մինչեւ ապրիլ 24 հացադուլի մէջ էր: Սա… բողոք է ընդդէմ գործընթացի, ընդդէմ անոր, թէ ինչպէ՛ս կ՛իրականացուի այս դատական գործընթացը:

«Ես գիտակցած եմ, թէ ինչի կ՛երթամ, պատրաստ եղած եմ եւ պատրաստ եմ աւելի վատ պայմաններու: Ես զոհ չեմ, ինծի պէտք չէ խղճալ, քանի որ սա գիտակցուած որոշում է», ըսած է Ռուբէն Վարդանեան` աւելցնելով. «Իմ պահանջներս նոյնն են: Եթէ կը դատէք` դատեցէք արհեստավարժ կերպով, բաց ու հրապարակային, Ազրպէյճանի բոլոր օրէնքներուն ու ընթացակարգերուն համաձայն, միւսներուն հետ միասին, միջազգային լրատուամիջոցներու, դիտորդներու ներկայութեամբ, եթէ այդքան վստահ էք ձեր արդարացիութեան մէջ: Իմ գործս արհեստականօրէն մի՛ առանձնացնէք»:

«Իմ բոլոր հայրենակիցներուս, սիրելի ու հարազատ մարդոց կ՛ուզեմ ըսել հետեւեալը` կը դատեն ոչ թէ զիս ու միւս 15 հոգին, այլ բոլոր հայերը: Ու եթէ դուք այդ չէք հասկնար, ուրեմն այդ մեծ ողբերգութիւն է, քանի որ սա ամբողջ պատմութեան, հակամարտութեան վերջը չէ, այլ ընդամէնը հերթական փուլը` ի ափսոսանք բոլոր կողմերուն», նշեց Վարդանեան` ընդգծելով. «Երբ կը տեղափոխուէի Արցախ, ես գիտէի ինչի կ՛երթամ: Ոեւէ մարդ իր կեանքին մէջ ամէն բան կ՛ընէ միայն իրեն համար, յանուն իրեն, եւ Աստուծոյ առջեւ պատասխան կու տայ միայնակ` իր բոլոր միտքերուն, խօսքերուն, գործողութիւններուն համար: Ես ատոր մէջ խորապէս համոզուած եմ: Եւ եթէ նոյնիսկ մէկը ինքզինք կը զոհէ յանուն հայրենիքի, ընտանիքի կամ սկզբունքներու, այդ միմիայն իր անձնական որոշումն է եւ իր պատասխանատուութիւնը: Այնպէս որ, այս իմաստով ես ամէն ինչ գիտակցուած ըրած եմ»:

«Չեմ գիտեր` ես կ՛ունենա՞մ արդեօք կարելիութիւն ձեզի հետ շփուելու, թէ ոչ, ուստի կ՛ուզեմ ներողութիւն խնդրել բոլոր անոնցմէ, որոնց երբեւէ նեղացուցած եմ խօսքով, գործով կամ անուշադրութեամբ: Ներող եղէք: Ես այդ չեմ ըրած վատ միտքով, նախանձէ, գոռոզութենէ կամ վրէժխնդրութենէ դրդուած: Ես չէի ուզեր ոեւէ մէկուն ցաւ պատճառել», շեշտած է Վարդանեան: