Երեքշաբթի, 25 մայիսին վախճանեցաւ Տանն Կիլիկիոյ կաթողիկէ հայոց Գրիգոր Պետրոս Ի. կաթողիկոս պատրիարքը:

Կենսագրական գիծեր.

Ծնած է Հալէպ 15 նոյեմբեր 1934-ին, վեցերորդը` 12 զաւակներու տէր ընտանիքի մը: Ծնողքը ապաստանած էր Հալէպ, Թուրքիոյ Մարտին քաղաքի ջարդերէն ետք: Ընտանիքը վերջնականապէս կը հաստատուի Լիբանան 1938-ին:

Իր նախնական ուսումը ստացած է Ֆըրն Շըպպեքի Ֆրերներու Նոթրը Տամ դպրոցին մէջ:

Կը մտնէ Զմմառու պատրիարքական կղերի միաբանութեան փոքր ընծայարանը, Զմմառ ապա Ճիւնի, ու կը յաճախէ Մարիսթ Ֆրերներու վարժարանը:

Պաքալորէան առնելէ ետք` կ’ուղարկուի Հռոմի քահանայապետական Լեւոնեան հայ վարժարանը, ուր վեց տարի կը յաճախէ Յիսուսեան հայրերու քահանայապետական Գրիգորեան (Կրեկորիանա) համալսարանը` ստանալով սքոլասթիք փիլիսոփայութեան պաքալորէան եւ աստուածաբանութեան լիսանսի վկայականը:

Ուսումը աւարտելէ ետք կը վերադառնայ Լիբանան, ուր կը ձեռնադրուի Զմմառու միաբան կուսակրօն վարդապետ 28 Մարտ 1959-ին, ձեռամբ վսեմաշուք կարդինալ Գրիգոր Պետրոս ԺԵ. Աղաճանեան կաթողիկոս պատրիարքի, որ նախագահն էր Ժողովուրդներու աւետարանացման համաժողովին:

1960 թուականին եղած է Զմմառու փոքր ընծայարանի փոխտեսուչ եւ փոխժողովրդապետ Ճիւնիի մէջ, ուր մէկ տարի պաշտօնավարելէ ետք, կ’անուանուի տնօրէն Պուրճ Համուտի Հայ կաթողիկէ Մեսրոպեան վարժարանին: Տնօրէնութեան պաշտօնը կը վարէ 9 տարի` 1962 թուականէն 1996 թուականը:

1969-ին կ’ընտրուի ընդհանուր մատակարար Զմմառու պատրիարքական կղերի միաբանութեան:

1976 թուականին կը նշանակուի Հայ կաթողիկէ եկեղեցւոյ Ֆրանսայի թեմին ծառայելու, իսկ 3 յունուար 1977-ին` Պօղոս Զ. սրբազան պապը զինք կը նշանակէ տիտղոսաւոր Եպիսկոպոս Ամիտայի (Տիարպեքիր) հայոց եւ առաքելական եկզարք ֆրանսաբնակ հայ կաթողիկէ հաւատացեալներուն:

Եպիսկոպոս կ’օծուի 13 փետրուար 1977-ին, Պուրճ Համուտի Ս. Փրկիչ եկեղեցւոյ մէջ:

20 Յունիս 1986-ին, Յովհաննէս Պօղոս Բ. սրբազան պապը Ֆրանսայի հայ կաթողիկէներուն համար կը ստեղծէ Փարիզի Ս. Խաչ թեմը եւ զինք կը նշանակէ առաջին եպիսկոպոսը այդ թեմին:

15 հոկտեմբեր 1988-ին կը նշանակուի առաքելական այցելու Արեւմտեան Եւրոպայի հայոց, որոնք զուրկ էին տեղական առաջնորդէ:

1997-ին կ’աւարտէ «Քրիստոնէական կաթողիկէ եկեղեցւոյ» արեւմտահայերէն թարգմանութեան հրատարակութիւնը, որուն թարգմանութիւնն ու տպագրութիւնը վարած էր:

1997-էն 2014 վարած է Հռոմի քահանայապետական Լեւոնեան հայ վարժարանի ընդհանուր մատակարարի պաշտօնը:

2005-ին եւ 2009-ին ան կը կազմակերպէ Հռոմի եւ Լիբանանի մէջ այժմ Ընդհանրական եկեղեցւոյ վարդապետ` Ս. Գրիգոր Նարեկացիին նուիրուած երկու գիտաժողով, որոնց զեկուցումներուն հրատարակութիւններն ալ կը հոգայ:

7 ապրիլ 2013-ին, երբ կը հաստատուի իր յաջորդը` Արհի. հայր Յովհաննէս եպիսկոպոս Թէյրուզեան, իբրեւ թեմին առաջնորդ, ան կը դառնայ վաստակաւոր եպիսկոպոս Ֆրանսայի թեմին, որուն ծառայած էր իբրեւ առաջնորդ 36 տարիներ շարունակ:

25 յունիս 2015-ին երջանկայիշատակ Ներսէս Պետրոս ԺԹ. պատրիարքի վախճանումէն ետք, եւ ըստ Արեւելեան եկեղեցիներու կանոնագիրին ան, իբրեւ մնայուն Սիւնհոդոսի կարգերէց եպիսկոպոս, կը դառնայ պատրիարքական կառավարիչ Հայ կաթողիկէ եկեղեցւոյ:

25 յուլիս 2015-ին Հայ կաթողիկէ պատրիարքական եկեղեցւոյ սիւնհոդոսական հայրերը զինք կ’ընտրեն 20-րդ կաթողիկոս պատրիարք Տանն Կիլիկիոյ կաթողիկէ հայոց եւ ան կ’առնէ Գրիգոր Պետրոս Ի. անունը:

Նորընտիր պատրիարքի գահակալութեան արարողութիւնը տեղի կ’ունենայ նոյն տարուան օգոստոս 9-ին Զմմառու Տիրամօր վանքի շրջափակին մէջ: