ՀՅԴ Հոլանտայի Հայ դատի յանձնախումբի նախագահ Մասիս Աբրահամեան «Արմէնփրես»-ի հետ զրոյցի մը ընթացքին յայտնած է, որ Հոլանտայի հայ համայնքը Հայոց ցեղասպանութեան 102-ամեակին առիթով պիտի կազմակերպէ ձեռնարկներու շաբաթ:

«Հայ դատի գրասենեակը կը համագործակցի հայկական միւս կազմակերպութիւններուն հետ: Նախորդ տարուան նման նախատեսած ենք շարք մը ձեռնարկներ: Ձեռնարկներու շաբթուան սկիզբ պիտի տրուի 18 ապրիլին: Այդ օր Հոլանտայի խորհրդարանի շէնքին մօտ տեղի պիտի ունենայ հանրահաւաք, որուն ընթացքին պիտի յանձնենք պահանջագիր, որուն բնագիրը արդէն նախօրօք քննարկած ենք միւս կազմակերպութիւններուն հետ: Պահանջագիրին մէջ հիմնական շեշտադրումը այն է, որ Հայոց ցեղասպանութեան խնդիրի լուծումը միջազգային ճանաչումն է», ըսած է Մասիս Աբրահամեան:

22 ապրիլին մեծ ցոյց տեղի պիտի ունենայ մայրաքաղաք Ամսթերտամի մէջ: Մասիս Աբրահամեան նշած է, որ Հայոց ցեղասպանութեան 100-ամեակէն սկսեալ, ձեռնարկներուն մեծ թիւով հայեր կը մասնակցին: Արդէն համաձայնութիւն կայ ոստիկանութեան հետ, ճշդուած են այն փողոցները, ուրկէ պիտի անցնի քայլարշաւը: Մասնակիցները երթով պիտի շարժին Ամսթերտամի ցոյցերու հաւաքատեղի` հրապարակ: Հանրահաւաքին պիտի մասնակցին ականաւոր դէմքեր, ցեղասպանութիւններու դէմ պայքարի ջատագովներ: 24 ապրիլին ալ Հայոց ցեղասպանութեան յիշատակը յաւերժացնող յուշարձաններու մօտ տեղի պիտի ունենան յիշատակի ձեռնարկներ:

«2004 թուականէն ետք, երբ Հոլանտան պաշտօնապէս ճանչցաւ Հայոց ցեղասպանութիւնը, հետագային իր քաղաքականութեան մէջ քիչ թէ շատ շրջադարձ կատարեց: Կարծես զղջացին, որ ցեղասպանութիւն բառը օգտագործած են: Մասնաւորաբար, ձախակողմեան ուժերէն Աշխատաւորական կուսակցութիւնը, որ թրքամէտ է, որոշակի շրջադարձ ցոյց տուաւ: Աստիճանաբար նկատուեցաւ, որ քաղաքական շրջանակներու մէջ ցեղասպանութիւն բառը փոխարինուեցաւ ցեղասպանութեան խնդիր բառով: Հիմնականին մէջ մեր պայքարը այն է, որ ատիկա տեղի չունենայ», ըսած է Մասիս Աբրահամեան:

Ան ընդգծած է, որ անհատապէս, առանձին բոլորն ալ կ՛ընդունին Հայոց ցեղասպանութիւնը, սակայն քաղաքական շրջանակի մէջ կը խուսափին: Ատիկա հայ համայնքի մօտ մեծ ընդվզում կը յառաջացնէ, հետեւաբար կը պահանջենք, որ այդ բառին հետ չխաղան եւ օգտագործեն ճիշդ բնորոշումները:

«Շուտով այստեղ ընտրութիւններ տեղի պիտի ունենան, իշխանութիւնը, ըստ երեւոյթին, պիտի չփոխուի: Հետեւաբար չեմ կարծեր, որ այս քաղաքականութեան մէջ մեծ փոփոխութիւններ պիտի ըլլան: Այսինքն` ընդունած են Հայոց ցեղասպանութիւնը, հիմա կը խուսափին այդ բառը օգտագործելէ, սակայն նաեւ Թուրքիան մշտապէս կը պահեն լարուածութեան մէջ: Ցեղասպանութեան քաղաքականութիւնը կ՛օգտագործեն իբրեւ մանրադրամ», աւելցուցած է Մասիս Աբրահամեան:

�