Ֆրանչիսկոս Սրբազան Քահանայապետը ընդունեց Հայ Կաթողիկէ եկեղեցւոյ պատրիարքական սիւնհոդոսի եպիսկոպոսները, գլխաւորութեամբ Ամենապատիւ եւ գերերջանիկ Ներսէս Պետրոս ԺԹ կաթողիկոս - պատրիարքին որ այս առթիւ Սրբազան Քահանայապետին արտասանած իր ողջոյնի խօսքին մէջ, երախտագիտութիւն յայտնեց Ֆրանչիսկոս Պապին, որ ընդունած է սուրբ զոհը մատուցել (12 ապրիլ 2015-ին), Հայոց` Մեծ Եղեռնի Հարիւրամեակի տարելիցին, մէկ ու կէս միլիոն քրիստոնեայ նահատակներու յիշատակին, որոնք նախընտրեցին կեանքերնին զոհել Քրիստոսի. Աւետարանին եւ Խաչին ի սպաս, ­քան թէ ուրանալ իրենց պապենական հաւատքը, որոնց շարքին էր նաեւ Երանելի Ինքնատիոս Մալոյեանը` զոր երջանկայիշատակ Սուրբ Յովհաննէս Պօղոս Բ` երանելի հռչակեց, 7 հոկտեմբեր 2001-ին։

Ամենապատիւ Հոգեւոր Տէրը ապա ընդգծեց թէ` Սուրբ Պետրոս Տաճարին մէջ, Սրբազան Քահանայապետի գլխաւորելիք պատմական արարողութիւնը ստանձնեց համամիութենական աննախընթաց բնոյթ մը, այն առումով որ ``մեր առաքելական եղբայրները, Գարեգին Բ Կաթողիկոսը Էջմիածնէն եւ Արամ Ա Անթիլիասէն, հրաւիրուած Սուրբ Աթոռի կողմէն, իրենց մասնակցութիւնը պիտի բերեն արարողութեան, իրենց ընկերացող պատուիրակութիւններով։
Առ աւելին, Հայաստանի հանրապետութեան Նախագահը, ընդառաջելով իմ հրաւէրիս, ինք եւս, պատուիրակութեան մը ընկերակցութեամբ պիտի մասնակցի արարողութեան։ Ու պիտի մասնակցին նաեւ աշխարհի զանազան վայրերէն ժամանած կաթողիկէ եւ առաքելական հայ հաւատացեալներ - ըսաւ Հոգեւոր Տէրը, ու անդրադարձաւ Գրիգոր Նարեկացիին` Տիեզերական Եկեղեցւոյ Վարդապետ հռչակման անսպասելի եղելութեան որ այս պատմական առիթին տուաւ կրօնական ազգային յատուկ արժէք մը, որուն համար ձեզի երախտապարտ ենք - ըսաւ Պատրիարքը մատնանշելով թէ ``Սուրբ Գրիգոր նարեկացին, հայ ազգի ամենասիրուած եւ սերտուած սուրբն է, ու անոր ``Մատեան Ողբերգութեան`` աղօթագիրքը միշտ եղած է հայ ընտանիքներու մօտ պահպանուած գիրքը, սուրբ գիրքին առընթեր։.

Նորին Սրբութիւն` ձեր նախորդները մեր եկեղեցւոյ պատմութիւնը դրոշմեցին – ըսաւ ապա Ներսէս Պետրոս ԺԹ, վերյիշելով Պենետիկտոս ԺԴ երջանկայիշատակ Քահանայապետը­, որ վերանորոգեց հայ կաթողիկէ եկեղեցին, ու Աբրահամ եպիսկոպոս Արծիւեանը, 6 դետկետմբեր 1742-ին, հաստատեց Տանն Կիլիկիոյ Պատրիարք, ծնունդ տալով ``Հայ Կաթողիկէ Եկեղեցւոյ``։

Լեւոն տասն երրորդ Պապին կը պարտինք ապա Լեւոնեան քահանայապետական վարժարանի կառուցումը` 1 մարտ 1883-ին, պատրաստելու համար հայ կաթողիկէ հոգեւորականները եւ զոր Պատրիարքներ, եպիսկոպոսներ եւ քահանաներ նուիրեց մեր համայնքին որոնց շարքին բազմաթիւ նահատակներ։ Պենետիկտոս ԺԵ եղաւ ապա առաջինը որ ձայնը բարձրացուց դատապարտելու համար Օսմանեան Կայսրութեան մեծ եղեռնի արարքը, իր 10 հոկտեմբեր 1915-ին թուակիր նամակով ուղղուած` Թուրքիոյ Սուլթան Մեհմեդ Ե։

Ինչպէս ապա չյիշել ձեր սուրբ նախորդը` Յովհաննէս Պօղոս Բ քահանայապետը, որ հանդիսացաւ առաջին Պապը որ այցելեց Հայաստան երկիրը, մասնակցելու համար հայ ազգի քրիստոնէութեան որպէս պետական կրօն ընդունման 1700 ամեակին յոբելեանին։ Ան ապա 7 հոկտեմբեր 2001-ին` երանելի հռչակեց Մարտինի Արքեպիսկոպոս` Ինքնատիոս Մալոյեանը եւ 2005-ի` 19 յունուարին, Սուրբ Պետրոսի մէջ բացումն ու օրհնութիւնը կատարեց Սուրբ Գրիգոր Լուսաւորչի նուիրուած արձանին։ Իսկ մեր սիրեցեալ Պենետիկտոս ԺԶ քահանայապետը, օրհնեց եւ բացումը կատարեց ``Սուրբ Գրիգոր Լուսաւորիչ գաւիթին`` ուր զետեղուած է վերոյիշեալ արձանը­, եւ 5 սեպտեմբեր 2012-ին, պաշտօնական այցելութիւն կատարեց Լիբանանու` Հայ Կաթողիկէ Պատրիարքութեան աթոռ` Զմմառու Վանք։

Սրբազան Հայր` այսօր մեզի` Հայ Եկեղեցւոյ եպիսկոպոսներուս համար ուրախ առիթ մըն է, ձեզի, Նորին Սրբութիւն, ներկայացնելու մեր որդիական երախտագիտութիւնը ու նորոգելու մեր սերտ կապը Սուրբ Պետրոսի աթոռին հետ - ըսաւ հուսկ Ամենապատիւ Հոգեւոր Տէրը եւ խօսքը եզրափակեց Նորին Սրբութեան ապահովելով ներկաներուն աղօթքները ու հայցելով Ամենասուրբ Աստուածամօր հովանին ու ապա խնդրեց որ Ֆրանչիսկոս Պապը` ներկաներուն, անոնց հաւատացեալներուն ու համայն աշխարհի հայ ազգի զաւակներուն շնորհէ իր առաքելական օրհնութիւնը։