«Թուրք Զինուորները Պիտի Շարունակեն�Մնալ Հիւսիսային Կիպրոսի Մէջ» �Կ՛ըսէ Չաւուշօղլու

«Անատոլու» լրատու գործակալութիւնը կը հաղորդէ, որ Թուրքիոյ արտաքին գործոց նախարար Մեւլութ Չաւուշօղլու յայտարարած է, որ Կիպրոսի հիմնախնդիրին շուրջ յունական եւ թրքական կողմերուն միջեւ բանակցութիւնները պիտի շարունակուին 18 յունուարին` թեքնիք մակարդակով:

«Բանակցութիւնները պիտի շարունակուին 18 յունուարին եւ նոյն կազմով, պիտի ըլլան ՄԱԿ-ի, կիպրական երկու կողմերու եւ բանակցութիւններու երաշխաւոր երկիրներու ներկայացուցիչները», ըսած է ան:

Թրքական դիւանագիտութեան պետը նաեւ խօսած է կղզիին հիւսիսային հատուածը գրաւած թրքական բանակի ներկայութեան մասին եւ յայտարարած, որ թրքական զինեալ ուժերը պիտի պահպանեն իրենց ներկայութիւնը եւ պնդած, որ ատիկա կարեւոր է Հիւսիսային Կիպրոսի մէջ ապրող թուրք ժողովուրդին համար:

Թուրքիոյ նախագահ Ռեճեփ Թայիփ Էրտողան իր կարգին յայտարարեց, որ թրքական բանակին Կիպրոսէն հեռացման հարցը քննարկման առարկայ չէ` աւելցնելով, որ Կիպրոսի հարցի լուծման վերաբերեալ յոյները տակաւին թուրքերուն սպասումներէն այլ սպասումներ ունին:

Յիշեցնենք, որ օրեր առաջ Ժընեւի մէջ տեղի ունեցան Կիպրոսի հիմնախնդիրին շուրջ կղզիի թրքական եւ յունական հատուածներու ղեկավարներուն միջեւ բանակցութիւնները: ՄԱԿ-ի նոր ընդհանուր քարտուղար Անթոնիօ Կութիերես ժընեւեան բանակցութիւնները նկարագրած էր իբրեւ յառաջընթացի համար «պատմական կարելիութիւն»:

Բանակցութիւններու երկրորդ փուլին, հոլովոյթին միացան Կիպրոսի անվտանգութեան երաշխաւոր երկիրներու` Բրիտանիոյ, Յունաստանի եւ Թուրքիոյ ղեկավարները:

Կղզին 1974-ի թրքական ներխուժումէն ի վեր մասնատուած կը մնայ:

�