Թուրքիոյ նախագահ Ռեճեփ Թայիփ Էրտողան յայտարարեց, որ մտադիր է երկրին համար աշխարհիկ նոր սահմանադրութիւն մը մշակել` շեշտելով, որ հակառակ երկրին մերձակայքին մէջ տիրող անկայունութեան, Թուրքիան դէպի իր ապագան կ՛ուղղուի պետութեան ու ժողովուրդին միասնականութեամբ: Այս մասին հաղորդեց «Ռաշա Թուտէյ»-ը:

Էրտողան Թուրքիոյ հանրապետութեան հիմնադիր Մուսթաֆա Քեմալ Աթաթուրքի մահուան ոգեկոչման ձեռնարկի ընթացքին յայտնեց. «Կ՛ուզենք մեր երկրին տրամադրել մեր մեծագոյն ծառայութիւններէն մէկը` հրապարակելով մեր ազգին համար աշխարհիկ սահմանադրութիւն մը, որ թրքական ժողովրդավարութեան հասունութեան ապացոյց նկատուի»:

Անդրադառնալով ահաբեկչութեան դէմ պայքարին` Թուրքիոյ նախագահը ըսաւ, որ իր երկիրը «մեծ յառաջընթաց արձանագրեց ահաբեկչութեան խնդիրի ամբողջական լուծման ուղղութեամբ, խնդիր մը, որ շուրջ կէս դար Թուրքիոյ համար ծանր բեռ եղած էր»:

«Խաղաղութիւնը, անվտանգութիւնն ու կայունութիւնը կ՛ամրապնդենք ոչ միայն մեր սահմաններուն մէջ, այլ նաեւ անոնցմէ դուրս», նշեց Էրտողան:

Ըստ անոր, իր երկիրը «103 տարի առաջ իր հաւատքով, վճռականութեամբ ու ամբողջ ուժով ձախողութեան մատնեց կեղտոտ խաղերը` իր կրած զրկանքի եւ դժուարութեան պայմաններուն մէջ»:

Էրտողան յայտնեց, որ իր կառավարութիւնը «կը շարունակէ նոր նախաձեռնութիւններու ճամբով ամրապնդել իր ներքին ճակատը` ներքին ու արտաքին յարձակումներու դէմ իր անառիկ բերդը»: