Հայաստանի մէջ կատարուած է առաջին ռոպոթային վիրահատութիւնը։ Լուրը հաղորդեց Երեւանի պետական բժշկական համալսարանի վերատեսուչ Արմէն Մուրատեանը, յայտնելով որ ռոպոթային վիրաբուժութիւնը առաջին անգամ կիրարկուած է «ՍլաւՄետ» բժշկական կեդրոնին մէջ։ Կատարուած է միզաբանական ռոպոթային վիրահատութիւն՝ երիկամի մասնահատում։ «Ուրախ ու հպարտ եմ, որ առաջին ռոպոթային վիրահատութիւնը կատարուեցաւ միզաբանութեան ոլորտին մէջ։ Վիրահատութիւնը բարեյաջող աւարտ ունեցաւ», դիտել տուաւ Մուրատեան։ Վիրահատական միջամտութիւնը կատարած է միզաբան Մհեր Մխիթարեան։