Աւազանի անունով Սեւան, ծնած է 1976ին, Պոլիս: Զաւակն է Կարօ եւ Մարի Տէյիրմենճեանի։

Կ’ուսանի Հինդլեան Նոր դպրոցի, ապա Կեդրոնական վարժարանի, ապա Երեւանի Պետական Համալսարանի Հայկական բանասիրութեան ֆաքիւլթէին (1993-1999) մէջ: Կ’աւարտէ որպէս մագիստրոս՝ հայոց լեզուի ու գրականութեան դասատուի ու բանասէրի կոչումով։ Կը շարունակէ ուսումը՝ նոյն համալսարանէն ստանալով դոկտորի (PhD) գիտական աստիճան։

Վերադառնալով քաղաքս, կ՚աշխատակցի համայնքային հաստատութիւններուն՝ Արաս հրատարակչատան, Ժամանակ, Մարմարա եւ Ակօս թերթերուն եւ սփիւռքի մամուլին, գրաբար, հայերէն եւ գրականութիւն դասաւանդելով Քատիր Հաս համալսարանի եւ զանազան վարժարաններու մէջ։
Կը հրատարակէ արեւմտահայ հեղինակներու գործերը։ Կը շարունակէ պատմաբանասիրական ուսումնասիրութիւններով աշխատակցիլ Երուսաղէմի պատրիարքութեան Սիոն, Պէյրութի Հայկազեան հայագիտական հանդէսներուն եւ այլ պարբերականներու։

Թարգմանած է յօդուածներ, գիրքեր, եղած է խմբագիրը բազմաթիւ հատորներու։ Կը բանախօսէ գիտաժողովներու, խորհրդաժողովներու մէջ, կը սարքէ բանախօսութիւններ՝ Թուրքիոյ եւ այլ գաղութներու մէջ։ Որպէս ուսուցիչ ու հսկիչ կը մասնակցի Կիւլպէնկեան Հիմնարկի հաւաքներուն։
Կը պաշտօնավարէ Երուսաղէմի Ս. Թարգմանչաց վարժարանի եւ Ժառանգաւորաց վարժարանի ու Ընծայարանի մէջ, որպէս հայոց լեզուի ու գրականութեան, հայոց պատմութեան եւ գրաբարի ուսուցիչ (2021-2024)։

Ի տղայ տիոց կը ծառայէ Թաքսիմի Ս. Յարութիւն եւ Գնալը կղզիի Ս. Գրիգոր Լուսաւորիչ եկեղեցիներուն, ուր կ’աշակերտի Մեսրոպ Արքեպս. Մութաֆեանի։ Մաս կը կազմէ Գնալը կղզիի Ներսէսեան դպրաց դասուն (ըլլալով տնօրէն խորհուրդի անդամ եւս)։ Կ’աշակերտի Նշան Չալկըճեանի հայկական ձայնագրութեան եւ շարականի դասերուն (1989-1993)։ 2024ին կը դառնայ Պէյօղլուի Ասողիկ Դպրաց Դասու պատուոյ անդամ։

Չորս-աստիճան կը ստանայ Ղալաթիոյ (1992), ուրար կրելու արտօնութիւն՝ Գնալը կղզիի մէջ (1994), Մեսրոպ սրբազանի ձեռամբ։ Կիսասարկաւագ կը ձեռնադրուի Ս. Երրորդութիւն եկեղեցին (2024), ձեռամբ Ամեն. Ս. Պատրիարք Հօր, որուն աշակերտած ալ է Գնալը կղզիի մէջ։ Սարկաւագ կը ձեռնադրուի Պալաթի Ս. Հրեշտակապետ եկեղեցին (8 Նոյեմբեր 2025), ձեռամբ Գերշ. Տ. Արամ Արքեպս. Աթէշեանի։

Ուսանողութեան շրջանին կը ծառայէ Ս. Էջմիածնի Մայր Տաճարէն ներս։ Իսկ Երուսաղէմի մէջ կը ծառայէ Ս. Յակոբեանց մայր տաճարի եւ տնօրինական սրբատեղիներու մէջ։

Պսակուած է Մէլիս Մօրպօյաճըի հետ (2019)։ Բախտաւորուած են աղջիկ զաւակով մը՝ Վանենի։

Բանակային ծառայութիւնը կատարած է Շանլըուրֆայի մէջ, 2006ին։

2025ին ընդունուած է Աթոռոյ ժառանգաւոր սան եւ ծառայութեան կոչուած է Օրմանեան Մատենադարանէն ներս։