Թեհրանի «Ալիք» օրաթերթը կը տեղեկացնէ թէ Իսրայէլ-Իրան 12օրեայ պատերազմի հետեւանքով վնասներ կրած է նաեւ «Արարատ» մարզաւանը։ Իրանի նախագահի կրօնական համայնքներու հարցերու յատուկ յանձնակատար հոճաթոլլահ Ալաւի 1 Յուլիսին այցելեց «Արարատ» մարզաւան եւ ծանօթացաւ 12օրեայ պատերազմի պատճառած վնասներուն։

Մարզաւանին պատասխանատուները Ալաւիին դիտել տուին, որ բացի փշրուած ապակիներուն եւ պատուհաններուն վերանորոգումէն, մարզադահլիճներէն մէկուն առաստաղին ունեցած վնասը մտահոգիչ է, նկատի ունենալով ճարտարապետական ստուգումներու անհրաժեշտութիւնը, որ կը կարօտի երկար ժամանակի։ Անոնք յայտնեցին, թէ իրենք յոյս ունին, որ յանձնակատարին այցելութիւնը պիտի նպաստէ այս հարցին շուտափոյթ լուծում մը գտնելուն։

Պատգամաւոր Արա Շահվերտեան եւս, ընդգծելով համայնքային աշխատանքները եւ աշխուժութիւնը բնականոն կշռոյթի վերադարձնելու կարեւորութեան մասին՝ կարեւոր համարեց «Արարատ»ի դերը՝ յուսալով, որ մարզաւանին ունեցած վնասներուն շուտափոյթ լուծում մը կը տրուի։
Ալաւի հետաքրքրուելով մարզաւանի պատմութեամբ՝ գեղեցիկ ճարտարապետական կոթող անուանեց «Արարատ»ը եւ նշեց. «Միանգամայն պարզ է, թէ մարզաւանը ի՞նչ նշանակութիւն կրնայ ունենալ «շէնցնող» ածականը կրող իրանահայ համայնքի համար»։ Ան աւելցուց որ այսպիսի հաստատութիւնները հասարակական կեանքի մէջ վերստին ներգրաւելու անհրաժեշտութիւնը անյետաձգելի գործ է, յատկապէս, համայնքներու ստեղծագործական ոգին վերադարձնելու առումով։