Հայաստան-Թուրքիա սահմանային Մարգարայի անցակէտի ժամանակաւոր բացումէն ետք, Հայաստանի Հանրապետութեան կառավարութեան որոշումով դէպի Սուրիա առաքուած մարդասիրական օժանդակութեան շարասիւնը Կիրակի, 23 Մարտի երեկոյեան ժամը 4.30ին հասաւ Հալէպ։

Հալէպի Արդիւնաբերական ցուցահանդէսի համալիրին մէջ, Սուրիոյ մէջ Հայաստանի Հանրապետութեան արտակարգ եւ լիազօր դեսպան Ռուբէն Խարազեան շարասիւնի պաշտօնական յանձնումը կատարեց Հալէպի փոխնահանգապետ Ֆաուազ Հիլալին։

Պաշտօնական յանձնումի արարողութեան ներկայ էին նաեւ Հալէպի մէջ Հայաստանի Հանրապետութեան գլխաւոր հիւպատոս Արա Աւետիսեան եւ Հալէպի նահանգապետարանի արտաքին յարաբերութիւններու պատասխանատու Ղասսան Ֆարուհ։

Օժանդակութիւնը, որ կը պարունակէր հայաստանեան արտադրութեան դեղորայք եւ ուտելիք, պիտի բաշխուի Հալէպի եւ Դամասկոսի մէջ։
Այս առիթով, Հայաստանի Հանրապետութեան արտակարգ եւ լիազօր դեսպան Ռուբէն Խարազեան ըսաւ հետեւեալը. «Պատմականօրէն սուրիացի եւ հայ ժողովուրդները բարեկամական կապեր ունեցած են եւ իրարու փոխօգնութեան հասած են։ Կը մաղթեմ, որ սուրիացի ժողովուրդը շուտով յաղթահարէ դժուար պահերը եւ Սուրիա դառնայ բարգաւաճ երկիր»։

Իր կարգին, Հալէպի փոխնահանգապետ Ֆաուազ Հիլալ շնորհակալութիւն յայտնեց Հայաստանի ժողովուրդին եւ կառավարութեան, աւելցնելով, որ Հայաստան-Սուրիա բարեկամական յարաբերութիւնները զարգացման ամուր ենթահող ունին։

Եւրոմիութիւնը ողջունեց Հայաստանի եւ Թուրքիոյ միջեւ Մարգարա-Ալիճան սահմանային անցակէտի ժամանակաւոր բացումը։ «Բարի կամքի այս քայլը ո՛չ միայն կ'օգնէ Սուրիոյ կարիքաւորներուն, այլ նաեւ ցոյց կու տայ երկկողմանի երկխօսութեան յաւելեալ արժէքը եւ կը նպաստէ Հայաստանի եւ Թուրքիոյ միջեւ յարաբերութիւններու ամբողջական բնականոնացման ջանքերուն», ըսուեցաւ հաղորդագրութեան մէջ։