Երէկ, 25 Մարտին հաղորդուած լուր մը հանգիստ «օհ» մը քաշել տուաւ Էսաեան վարժարանի ընտանիքին ու բազմաթիւ շրջանաւարտներու, որոնք այս վարժարանի մէջ ուսում ստացած էին տնօրէնուհի Սաթենիկ Նշանի պաշտօնավարութեան շրջանին։

Մեր ընթերցողները կը յիշեն որ Պէյօղլուի եկեղեցեաց Թաղային Խորհուրդի նախկին Ատենապետ, փաստաբան Սիմոն Չէքէմ դատ բացած էր Տիկին Սաթենիկի դէմ, զայն ամբաստանելով լուրջ յանցանքներով։ Դատավարութիւնը կ'ընթանար ծանր յանցագործութիւններու 41րդ ատեանի մէջ։ Դատական գործընթացը երկու տարի առաջ նախ սկսաւ հարցաքննութեամբ մը, յետոյ դատ բացուեցաւ եւ դատավարութիւնը սկսաւ։

Երէկ, 25 Մարտի առաւօտեան դատարանը վճիռ արձակեց, անպարտ հռչակելով Տիկին Սաթենիկ Նշանը։ Վճռին մէջ նշուեցաւ որ «համոզիչ փաստեր չկան Տիկին Նշանը մեղադրելու համար», միաժամանակ դատախազութիւնը եւս համակարծիք գտնուած էր երկարամեայ տնօրէնուհին արդարացնելու հարցին շուրջ։

Յիշեցնենք որ Տիկին Սաթենիկ Նշանն ալ իր կարգին դատ բացած էր Սիմոն Չէքէմի դէմ՝ դրամական փոխհատուցման հարցով։ Ինչպէս ծանօթ է, Տնօրէնուհին պաշտօնանկ եղած էր վարժարանի հիմնադրութեան 125ամեակի յոբելենական տարուայ ընթացքին եւ «թաղականութիւն»ը դրամական որեւէ հատուցում չէր ըրած։ Դատավարութիւնը վերջացած էր ի նպաստ Տիկին Սաթենիկի. ան ստացաւ իր հատուցումը։