Վերջին օրերուն հայաստանեան մետիան լայն տեղ կուտայ հայ-թրքական ցամաքային սահմանակէտերէն Մարգարայի անցակէտի բացման հարցին։ Նախընթաց օր Արտաքին Գործոց յայտարարութիւնը պաշտօնական հաղորդագրութեամբ մը տեղեկացուց որ իրենք պատրաստ են, գնդակը ուղարկելով թրքական դաշտ։

Ազգային Ժողովի փոխնախագահ Ռուբէն Ռուբինեան, առանց այլ մանրամասնութիւններ տալու, երէկ ըսաւ, որ այս պահուն Երեւանի եւ Անգարայի յատուկ ներկայացուցիչներու հաւանական հանդիպման մասին քննարկում չկայ։ Հայ-թրքական յարաբերութեան բնականոնացման հարցի յատուկ բանագնացներ Ռուբէն Ռուբինեան եւ Սէրտար Քըլըչ մինչեւ հիմա ունեցած են պաշտօնական չորս հանդիպում, վերջինը շուրջ մէկուկէս տարի առաջ՝ Վիեննայի մէջ։ Այդ հանդիպման ընթացքին է որ կողմերը պայմանաւորուած էին բանալ ցամաքային սահմանը երրորդ երկիրներու քաղաքացիներու համար՝ ամէնէն սեղմ ժամկէտներու մէջ։ Իրականացման գծով, սակայն, յառաջընթաց չկայ։