Ազրպէյճան կ՛ուզէ կարգաւորել Հայաստանի հետ յարաբերութիւնները եւ խաղաղութեան համաձայնագիր կնքել: Ազրպէյճանի նախագահի մամլոյ ծառայութիւնը կը հաղորդէ, որ այս մասին Լիթուանիոյ նախագահ Կիթանաս Նաուսետայի հետ երէկ տեղի ունեցած հանդիպումի ընթացքին յայտարարած է Ազրպէյճանի նախագահ Իլհամ Ալիեւ:

«Մենք լայնօրէն քննարկած ենք նաեւ շրջանին մէջ տիրող կացութիւնը, Ազրպէյճանի եւ Հայաստանի միջեւ յարաբերութիւններու կարգաւորման հոլովոյթը: Ես գիտեմ, որ նախագահը Ազրպէյճանէն ետք պիտի այցելէ Հայաստան: Համոզուած եմ, որ այս այցելութեան աւարտէն ետք ան ամբողջական պատկեր պիտի ունենայ:

«Մեր դիրքորոշումը շատ յստակ է, մենք կ՛ուզենք Հայաստանի հետ խաղաղութեան համաձայնագիր ստորագրել, մենք կ՛ուզենք կարգաւորել յարաբերութիւնները եւ փակել թշնամանքի էջը», ըսած է Ալիեւ: