Լուսաւորիչ դպրաց դաս-երգչախումբը երէկ ընկերային ցանցերու միջոցաւ շրջանառութեան մէջ դրաւ զեկոյց մը, որ ստեղծած է լայն արձագանգ։ Այս զեկոյցին բովանդակութիւնը կը վերաբերի Պէյօղլուի Ս. Եկեղեցեաց թաղային խորհուրդին եւ Լուսաւորիչ դպրաց դաս-երգչախումբի միջեւ յառաջացած խնդիրներուն։ Երգչախումբի երէկուան զեկոյցին մէջ նշուած է, որ Պէյօղլուի Ս. Եկեղեցեաց թաղային խորհուրդը արգելք դրած է, որպէսզի Թաքսիմի Ս. Յարութիւն եկեղեցիէն ներս արարողութիւններու եւ խորհրդակատարութիւններու երգեցողութիւնները կատարուին այս խումբին կողմէ։ Թաղային խորհուրդը երգչախումբի անդամներէն կը պահանջէ, որ խմբավար Յակոբ Մամիկոնեան հեռանայ անոնց գլուխէն։ Այս վերջին զեկոյցին մէջ շեշտուած է, որ Լուսաւորիչ երգչախումբը ունի 93 տարուան անցեալ մը եւ վերջին 32 տարիներուն Յակոբ Մամիկոնեան խմբավարի պաշտօնը կատարած է յաջողութեամբ ու նուիրումով՝ նպաստ բերելով հայկական մշակոյթին եւ արժանանալով մեր համայնքի համակրանքին։ Այս բոլորի լոյսին տակ երգչախումբը որոշած է ճանապարհը շարունակել խմբավար Յակոբ Մամիկոնեանի գլխաւորութեամբ։ Լուսաւորիչ երգչախումբը 82 տարիէ ի վեր անընդհատ Թաքսիմի Ս. Յարութիւն եկեղեցւոյ մէջ երգեցողութիւնները կը կատարէ, իսկ ներկայիս այդ սրբավայրէն ներս երգեցողութիւն եւ փորձ կատարելու հնարաւորութիւնը ապօրինի եւ անժամանակ ձեւով արգիլուած է՝ հակառակ անոր, որ եկեղեցին հանրութեան սեփականութիւնը կը համարուի։

Երգչախումբը յարմար դատած է հանրային կարծիքը իրազեկել այս մասին՝ շեշտելով, որ համաձայնութեան հասնելու ուղղեալ բոլոր նախաձեռնութիւնները մերժուած են։