Տիգրանակերտի վերանորոգուած ու բարեզարդուած Ս. Կիրակոս Եկեղեցին, պաշտամունքի վերաբանալու համար Ն.Ա.Տ. Սահակ Բ Պատրիարք Հայրը 5 Մայիս 2022, Հինգշաբթի երեկոյեան օդային ճամբով մեկնեցաւ Տիյարպաքըր, ուր դիմաւորուեցաւ պատուոյ սրահին մէջ։ Նորին Ամենապատուութեան կ’ընկերանային Գերշ. Տ. Արամ Արքեպս. Աթէշեան, Պատրիարքական Փոխանորդ Արժ. Տ. Գրիգոր Աւ. Քհնյ. Տամատեան, Արժ. Տ. Շիրվան Քհնյ. Միւրզեան։

Մեր Հոգեւոր Պետը առաջնորդուեցաւ հիւրանոց։

6 Մայիս 2022, Ուրբաթ Ժամը 11.00-ին Նորին Ամենապատուութիւնը, ընկերակցութեամբ Գերշ. Տ. Արամ Արքեպս. Աթէշեանի, Պատրիարքական Փոխանորդ Արժ. Տ. Գրիգոր Աւ. Քհնյ. Տամատեանի, Արժ. Տ. Շիրվան Քհնյ. Միւրզեանի եւ Ս. Կիրակոս Եկեղեցւոյ Ծխական Խորհուրդի Ատենապետ Էրկիւն Այըքի, այցելեց Կուսակալութիւն, ուր ընդունուեցաւ Կուսակալ Միւնիր Քարալօղլուի կողմէ։ Սոյն հանդիպումին ներկայ եղան նաեւ Արտաքին Գործոց Նախարարութեան Տիյարպաքըրի ներկայացուցիչ Աւագ Դեսպան Իպրահիմ Եաղլը։

Մեծայարգ Կուսակալը բարի գալուստ մաղթեց Նորին Ամենապատուութեան եւ հիւրերուն։

Մեր Հոգեւոր Պետը շնորհակալութիւն յայտնեց Կուսակալութեան եւ Կուսակալի անձին մէջ պատկան մարմիններուն, որոնք Ս. Կիրակոս Եկեղեցւոյ վերանորոգութեան, բարեզարդման եւ շրջակայքի կանոնաւորման համար ջերմ հետաքրքրութիւն ցուցաբերած էին։

Հանդիպման ընթացքին մեծայարգ Կուսակալը ընդարձակ բացատրութիւններ տուաւ նաեւ քաղաքի Ս. Սարգիս Եկեղեցւոյ մասին ծրագրուած վերականգնման աշխատանքներու մասին։ Կուսակալութեան միջոցներով պատրաստուած էր նաեւ վերականգնման ծրագիր մը, որ արդէն իսկ ընդունելութիւն գտած էր եւ Մայիս ամսուան ընթացքին կը նախատեսուէր վաւերացումը։

Կուսակալ Քարալօղլու հանդիպումին հրաւիրեց նաեւ Վաքըֆներու տնօրէնութեան պատասխանատուն, որ տեսալսողական ընդարձակ ներկայացումով մը տեղեկութիւններ փոխանցեց ներկաներուն։ Եկեղեցւոյ վերականգնման մասին խորհրդակցութիւններ տեղի պիտի ունենան նաեւ ապագային։