Միացեալ Նահանգներու աւելի քան 52 քոնկրեսականէ բաղկացած երկկուսակցական խումբը միացած է Քոնկրեսի հայկական հարցերով յանձնախումբի համանախագահ Ֆրենք Փալոնին եւ Կաս Պիլիրաքիսին` Միացեալ Նահանգներու արտաքին գործոց եւ պաշտպանութեան նախարարութիւններէն պահանջելով արգելակել չորրորդ սերունդի «Էֆ-16» կործանիչներու եւ արդիականացման սարքաւորումներու վաճառքը Թուրքիոյ: Այս մասին կը յայտնէ Ամերիկայի Հայ դատի յանձնախումբը:

4 փետրուարին արտաքին գործոց նախարար Էնթընի Պլինքընին եւ պաշտպանութեան նախարար Լոյտ Օսթինին ուղղուած նամակին մէջ նշուած է. «Մենք խստօրէն կոչ կ՛ուղղենք մերժելու Թուրքիոյ խնդրանքը` նոր «Էֆ-16»-ներու եւ արդիականացման սարքաւորումներու վերաբերեալ, եւ անյապաղ միջոցներու ձեռնարկելու` Էրտողանի վարչակարգը պատասխանատուութեան ենթարկելու համար: Միացեալ Նահանգները պէտք չէ հետագային որեւէ աջակցութիւն ցուցաբերեն Թուրքիոյ զինուած ուժերուն, քանի դեռ նախագահ Էրտողան շօշափելի քայլերու չէ ձեռնարկած` դադրեցնելու իր ապակայունացնող գործողութիւնները եւ միջազգային իրաւունք ու խախտումները երկրի եւ արտերկի մէջ»:

Նամակին մէջ շեշտուած է` դէպքը ցոյց կու տայ, որ Էրտողան պիտի չփոխէ իր վարքագիծը, քանի դեռ Միացեալ Նահանգներ չեն օգտագործած իրենց դիւանագիտական բոլոր գործիքները, այդ կարգին` տնտեսական նպատակային պատժամիջոցները:

Պայտընի վարչակազմին ուղղուած նամակը ստորագրած են քոնկրեսականներ Ճէյք Օչինքլոս, Թոնի Քարտենաս, Ճուտի Չու, Տէյվիտ Սիսիլի, Ճիմ Քոսթա եւ այլ: