Լեռնային Ղարաբաղի կարգավիճակը քննարկման ենթակայ չէ: Ազրպէյճանական «Թրենտ» կայքը կը հաղորդէ, որ Ազրպէյճանի նախագահ Իլհամ Ալիեւ այս մասին յայտարարած է «Հարաւային Կովկաս. Շրջանային զարգացումներ եւ համագործակցութիւն» նիւթով քննարկումներուն ժամանակ»:

«Մինվալ» կայքը հաղորդեց, որ Ալիեւ նաեւ նշած է, որ Պաքուն պատրաստ է Երեւանի հետ առեւտրական յարաբերութիւններ հաստատելու, սակայն ատոր համար Ազրպէյճանն ու Հայաստանը պէտք է ճանչնան մէկզմէկու սահմանները:

«Մենք պատրաստ ենք Հարաւային Կովկասի երկիրներուն, ներառեալ Հայաստանի հետ ազատ առեւտուր կատարելու: Սակայն ատիկա կը պահանջէ Ազրպէյճանի եւ Հայաստանի սահմաններու փոխադարձ ճանաչում: Մենք մեր կողմէ պատրաստ ենք ճանչնալու Հայաստանի սահմանները: Սակայն Հայաստանը նոյնպէս պէտք է ճանչնայ Ազրպէյճանի սահմանները, ներառեալ Ղարաբաղը` իբրեւ Ազրպէյճանի մաս: Այնպէս, որ մենք հայկական կողմէն քայլերու կը սպասենք», յայտարարած է Ալիեւ:

Անոր համաձայն, 30 հազար հայ կ՛ապրի Ղարաբաղի այն տարածքներուն մէջ, որոնք ներկայիս կը գտնուին ռուս խաղաղապահներու վերահսկողութեան տակ: «Մենք զանոնք կը նկատենք Ազրպէյճանի քաղաքացիներ, որոնց ուղեղները լուացած են հայկական քարոզչութեամբ», ըսած է ան:

Ազրպէյճանի նախագահը չէ բացառած նաեւ ուժանիւթային հարստութեան մատակարարումը Հայաստանին: «Կը կարծեմ, որ Հարաւային Կովկասի մէջ համագործակցութեան մեծ ներուժ կայ այն ոլորտներուն մէջ, որոնք կը վերաբերին, օրինակ, ուժանիւթին: Ազրպէյճան կրնայ դէպի Հայաստան ուժանիւթային հարստութիւններու կարողական մատակարար ըլլալ», յայտարարած է Ազրպէյճանի նախագահը:

Յիշեցնենք, որ Ալիեւ այդ քննարկումներուն ժամանակ նաեւ անդրադարձած էր Հարաւային Կովկասի մէջ համագործակցութեան եւ համարկման հարցով ազրպէյճանական կողմի կատարած առաջարկներուն եւ յայտարարած, որ Զանգեզուրի միջանցքի բացման հոլովոյթը սկսած է:

«Մենք համագործակցութեան առաջարկ ըրած ենք Հայաստանին փոխադրամիջոցային հարցերու շուրջ, մասնաւորաբար` Զանգեզուրի միջանցքի բացման վերաբերեալ, որ պիտի միաւորէ Ազրպէյճանը Նախիջեւանի ինքնավար հանրապետութեան հետ եւ միեւնոյն ժամանակ Հայաստանը երկաթուղային կապ պիտի ունենայ Ռուսիոյ եւ Իրանի հետ: Հոլովոյթը սկսած է, ընթացքի մէջ է: Ատիկա դիւրին չէ, սակայն սկսած է, եւ մենք աջակցութեան կարիք ունինք թէ՛ Մինսքի խմբակի համանախագահ երկիրներէն, ներառեալ Միացեալ Նահանգները, շրջանի երկիրներէն, ներառեալ Թուրքիան եւ Եւրոպական Միութիւնը: Եւ ցաւալի պիտի ըլլայ, որ Հայաստանը կորսնցնէ այս կարելիութիւնը, ասիկա վերջին կարելիութիւնն է», յայտնած էր ան