ՀասարակությունՆուբար Աֆեյանի Moderna ընկերությունը նախատեսում է կորոնավիրուսի դեմ իր փորձարարական պատվաստանյութի փորձարկումների վերջին փուլի առաջին արդյունքների մասին այս ամսվա վերջին զեկուցել, իսկ ԱՄՆ-ում գրանցվելու հայտը կարող է դեկտեմբերին ներկայացնել, հայտնում է «Ամերիկայի ձայնը»:

Երկուշաբթի օրը արդյունավետ պատվաստանյութի արագ ի հայտ գալու հույսերը ամրապնդվեցին, երբ Pfizer-ը հայտնեց, որ իր պատվաստանյութը ցուցաբերել է 90 տոկոսանոց արդյունավետություն՝ հիմնված խոշոր կլինիկական փորձարկումների միջանկյալ արդյունքների վրա:

Այն բանից հետո, երբ Moderna-ն պատվաստանյութի արդյունավետության վերաբերյալ միջանկյալ տվյալներ տրամադրի, ընկերությունը, հնարավոր է, ստիպված լինել երկու ամիս սպասել կողմնակի ազդեցությունների բացակայության վերաբերյալ լրացուցիչ տվյալների` նախքան կարգավորող մարմիններին հայտ ներկայացնելը: Անվտանգության մասին տվյալները սպասվում են նոյեմբերի երկրորդ կեսին:

Ըստ Moderna-ի գլխավոր տնօրեն Ստեֆան Բանսելի՝ Սննդամթերքի եւ դեղամիջոցների որակի վերահսկման վարչության պահանջների համաձայն՝ պատվաստանյութի արդյունավետությունը պետք է կազմի առնվազն 50 տոկոս: Ընկերությունը դեռ չգիտի, թե որքանով է արդյունավետ իր փորձարարական պատվաստանյութը:

«Դժվար է կանխատեսել արդյունավետությունը, քանի դեռ տվյալներ չկան»,- ասել է Բանսելը՝ ելույթ ունենալով Credit Suisse-ում կայացած համաժողովում: