Քրեմլին չափազանց կարեւոր կը նկատէ Լեռնային Ղարաբաղի վերաբերեալ համաձայնութիւններու կատարումը, ինչ որ ապագային կրնայ հող նախապատրաստել մարտական գործողութիւններու լիակատար դադրեցման եւ տագնապի լուծման քաղաքական-դիւանագիտական միջոցներուն անցնելու: Այս մասին կը հաղորդէ ԹԱՍՍ լրատու գործակալութիւնը:

«Մենք բարձր կը գնահատենք մարդասիրական դադարի մասին որոշումը, որ ձեռք բերուած է Ռուսիոյ, Հայաստանի եւ Ազրպէյճանի արտաքին գործոց նախարարներու հաղորդակցութիւններուն շնորհիւ», երէկ լրագրողներուն ըսած է Ռուսիոյ նախագահի բանբեր Տմիթրի Փեսքով:

Ան ընդգծած է, որ այժմ Մոսկուան «շատ ուշադիր կը հետեւի կացութեան, Քրեմլինի մէջ երկու կողմերէն հաղորդակցութիւններ կը տեսնեն զինադադարի խախտումներու մասին»:

«Մենք կը կարծենք, որ ձեռք բերուած համաձայնութիւններու գործադրութիւնը չափազանց կարեւոր է ապագային մարտական գործողութիւններու լիակատար դադրեցման եւ տագնապին լուծման քաղաքական-դիւանագիտական միջոցներուն անցնելու համար», ընդգծած է Քրեմլինի բանբերը: