Իրանի արտաքին գործոց նախարարութեան պաշտօնական ներկայացուցիչ Սայիտ Խաթիպզատէ Ազրպէյճանին եւ Հայաստանին կոչ ուղղած է հաւատարիմ մնալու զինադադարին եւ միջազգային արժեչափերու ծիրին մէջ վերսկսելու ղարաբաղեան տագնապի լուծման վերաբերեալ բանակցութիւնները: Այս մասին կը հաղորդէ ԻՐՆԱ պետական լրատու գործակալութիւնը:

Խաթիպզատէ մամլոյ ասուլիսի ընթացքին ափսոսանք յայտնած է Լեռնային Ղարաբաղի մէջ կրակոցի դադրեցման դրութեան խախտման համար, որուն վերաբերեալ համաձայնութիւնը ձեռք բերուած էր նախորդ շաբաթ, եւ դատապարտած է քաղաքացիական ենթակառոյցներու եւ բնակելի շէնքերու հրթիռակոծութիւնը:

Խաթիպզատէ անգամ մը եւս ընդգծած է, որ Իրան պատրաստ է աջակցելու Հայաստանի եւ Ազրպէյճանի միջեւ բանակցային հոլովոյթին` շրջանին մէջ ամուր խաղաղութեան հասնելու համար: