Թուրքիոյ արտաքին գործոց նախարար Մեւլութ Չաւուշօղլու բացառեց, որ Անգարան կարենայ իրանեան քարիւղին այլընտրանք մը գտնել` նշելով. «Մեզի համար դժուար է ներածուած քարիւղի աղբիւրները տարատեսակ դարձնել, որովհետեւ մեր զտարաններուն ճարտարագիտութիւնը չի յարմարիր շարք մը երկիրներու մէջ արտադրուած հում քարիւղին, եւ գիտէք, թէ իրաքեան Քերքուք քաղաքէն թրքական Ճէյհան նաւահանգիստ երկարող քարիւղի խողովակաշարը վերանորոգման կը կարօտի եւ հիւսիսային Իրաքէն մեզի հասնող խողովակաշարին կարողականութիւնը սահմանափակ է»:

Ան նշեց, որ Քաթար եւ Սլովաքիա գտնուած ատեն նշմարած է, թէ Իրանի դէմ ամերիկեան պատժամիջոցներուն պատճառով ընկերութիւններուն մօտ գոյութիւն ունի մտահոգութիւն մը:

«Գերմանիան, Ֆրանսան եւ Բրիտանիան Իրանի հետ աշխատելու համար «Ինսթեքս» անունով մեքանիզմ մը հնարեցին, եւ մենք եւս աշխատանք կը տանինք ատոր նման մեքանիզմի մը որոնման վրայ», ըսաւ թրքական դիւանագիտութեան պետը: