Գերմանիոյ արտաքին գործոց նախարար Զիկմար Կապրիէլ, պատասխանելով լրագրողներու հարցումներուն, յայտնած է, թէ ճիշդ չի նկատեր Թուրքիոյ եւ Եւրոպական Միութեան միջեւ բանակցութիւններու ամբողջական դադրեցումը, որովհետեւ այդ պարագային Եւրոպական Միութիւնը միայն նոր յաղթաթուղթեր պիտի դնէ Թուրքիոյ նախագահ Ռեճեփ Թայիփ Էրտողանի ձեռքը:

«Տէօչէ Վելլէ»-ի թրքական ծառայութիւնը կը հաղորդէ, որ Կապրիէլ շեշտած է, որ Եւրոպական Միութեան` Թուրքիայէն ամբողջովին հրաժարիլը պիտի ուժեղացնէ Էրտողանի դիրքերը Թուրքիոյ մէջ, ուր ան կը փորձէ հաստատել բռնապետական կարգեր:

«Ան իր ձեռքին մէջ հզօր խաղաթուղթ պիտի ունենայ այն իմաստով, որ Եւրոպան իրենց կռնակ դարձուցած է: Ան պիտի ըսէ. «Ահա, տեսէ՛ք, անոնք մեզի չեն ուզեր». ատիկա պիտի ուժեղացնէ երկրին մէջ անոր իշխանութիւնը», նշած է գերմանական դիւանագիտութեան պետը:

Կապրիէլ աւելցուցած է, որ եթէ Գերմանիան խզէր իր յարաբերութիւնները բոլոր ոչ ժողովրդավարական երկիրներուն հետ, ապա անոնց մօտ ժողովրդավարական սկզբունքներու տարածման ուղղուած աշխատանքը որեւէ ազդեցութիւն պիտի չունենար: