Թուրքիոյ Եւրոպական Միութեան հարցերով նախարար Էօմեր Չելիք յայտարարած է, որ Գերմանիոյ արտաքին գործոց նախարար Զիկմար Կապրիէլ կը կրկնօրինակէ ցեղապաշտները եւ Թուրքիոյ իշխանութիւնները քննադատած ատեն չ՛արտայայտեր իր սեփական միտքերը: Այս մասին կը հաղորդէ թրքական «Տիքեն» կայքը:

«Ան որեւէ ինքնուրոյն յայտարարութիւն չի կատարեր: Ան կրկնօրինակէ ծայրայեղ աջակողմեան շարժումի անդամներն ու ցեղապաշտները, անոնց խօսակցութիւնը բաղկացած է «քոփի-փէյստ»-է», ըսած է Չելիք:

Յիշեցնենք, որ Կապրիէլ գերմանական «Տէօչէ Վելլէ» պատկերասփիւռի կայանին հետ հարցազրոյցի մը ընթացքին, խօսելով Թուրքիոյ մէջ ձերբակալուած Գերմանիոյ քաղաքացի լրագրող Տենիզ Եուճելի մասին, նշած էր. «Ինչ կը վերաբերի Էրտողանին` Գերմանիան որոշած է այսուհետեւ շատ լուրջի չառնել զինք»: