Թուրքիոյ քրտամէտ ընդդիմադիր Ժողովուրդներու Դեմոկրատական Կուսակցութեան հայ պատգամաւոր Կարօ Փայլանը դիմատետրի իր էջին գրած է, որ բողոք ներկայացուցած է ընդդէմ թրքական «Եէնի Շաֆաք» պարբերականի սիւնակագիր Հայրետտին Քարամանի:

«Եէնի Շաֆաք»-ի սիւնակագիր Քարամանը իր գրութեամբ վիրաւորած էր քրիստոնեաները:

«Կէաւուրը բարեկամ չի դառնար, խոզի կաշիէն ալ սփռոց չի պատրաստուիր», գրած էր սիւնակագիրը:

Քարամանը իր գրութեան մէջ նաեւ մէջբերումներ կատարած է «Գուրան»էն՝ մահմետական եւ ոչ մահմետական ժողովուրդներու փոխյարաբերութիւններուն վերաբերեալ:

Կարօ Փայլանը Քարամանի դէմ Թուրքիոյ դատախազութիւն բողոք ներկայացուցած է՝ ժողովուրդին մէջ իրարու հանդէպ ատելութիւն սերմանելու եւ քրիստոնեաները նուաստացնելու մեղադրանքներով: