2006 թուականին Ստեփանակերտի մէջ սկսած է Աստուածամօր սուրբ Հովանի Մայր տաճարին կառուցումը:

Արցախի Հանրապետութեան քաղաքաշինութեան նախարարութեան մամլոյ ծառայութեան փոխանցած տեղեկութիւններով` նիւթական միջոցներու սղութեան պատճառով շինարարութիւնը սկզբնական փուլին դանդաղ ընթացած է: Գլխաւոր տաճարին կառուցումը շարունակելու համար՝ ձեռք մեկնած են տարբեր բարերարներ ու անհատ մարդիկ:

Բազմանկիւն եռայարկ եկեղեցւոյ բարձրութիւնը աւելի քան 40 մեթր է, խաչինը` 3, իսկ զանգակատունը` 24 մեթր: Տաճարը ունի 6 սիւն, որոնք միմեանց հետ կապուած են կամարներով:

30 մեթր տրամագիծով եւ 6 մեթր բարձրութեամբ ինքնատիպ կամարներով նկուղային սրահը պիտի ծառայէ եկեղեցական տարբեր ձեռնարկներ կազմակերպելու համար: Տաճարը պիտի ունենայ երեք մուտք: Նիւթական խնդիրներ չառաջանալու պարագային՝ կը նախատեսուի կառուցումը աւարտել այս տարուան վերջը:

Այս պահուն կապալառու կազմակերպութիւնը պիտի կառուցէ գմբէթը: Աշխատանքները աւարտելէ յետոյ՝ կը նախատեսուի յարակից տարածքի բարեկարգում: