«Աւրորա» համաշխարհային մարդասիրական նախաձեռնութեան ծիրէն ներս Հայաստան գտնուող աշխարհահռչակ շանսոնյէ Շառլ Ազնաւուր Մայիս 31-ին այցելեց Տաթեւի վանական համալիր: Այս մասին կը տեղեկացնէ «Հայաստանի զարգացման նախաձեռնութիւններ» հիմնադրամը:

Երգահանին կ՛ուղեկցէին որդին` Նիքոլայ Ազնաւուրը, երգիչի ընկերներն ու գործընկերները:

Շառլ Ազնաւուրի առաջին կանգառը «Տաթեւեր» ճոպանուղիի Հալիձոր կայան էր, ուր մեծանուն երգիչը դիմաւորեցին «Հայաստանի զարգացման նախաձեռնութիւններ» (IDeA) հիմնադրամի տնօրէն Էդգար Մանուկեան, ճոպանուղիի տնօրէն Վահէ Բաղդասարեան, հիմնադրամի աշխատակիցները:

Էդգար Մանուկեան Շառլ Ազնաւուրուն եւ հիւրերուն ներկայացուց «Տաթեւեր» ճոպանուղիի կառուցման պատմութիւնը, «Տաթեւի վերածնունդ» հիմնադրամի իրականացուցած ծրագիրները, որոնք արդէն էականօրէն փոխած են կեանքը Տաթեւի շրջանին մէջ:

Երգիչը իր որդիին հետ հետ հիացաւ Սիւնիքի բնութեամբ: Ան իր տեսախցիկով անընդհատ կը նկարէր իր առջեւ բացուած հրաշալի բնութիւնը։

Ազնաւուրը որդիին եւ ընկերներուն հետ ճոպանուղիով ուղեւորուեցաւ Տաթեւի վանական համալիր, ուր հիւրերը դիմաւորեցին Տաթեւի վանքի վանահայր Տէր Միքայէլ վարդապետ Գէորգեան, տեղի բնակիչները, խումբ մը զբօսաշրջիկներ:

Վանքի Սուրբ Պողոս Պետրոս եկեղեցւոյ մէջ կատարուեցաւ Նիքոլայ Ազնաւուրի մկրտութեան արարողութիւնը` ձեռամբ վանահայր Տէր Միքայէլ վարդապետ Գէորգեանի: Արարողութեան կ՛ուղեկցէր Տաթեւի վանական երգչախումբը իր կատարումներով:

«Ես շատ հպարտ եմ, որ որդիս` Նիքոլան, որոշեց մկրտուիլ Հայաստանի մէջ: Ծնողներս այնքան երջանիկ պիտի ըլլային` իմանալով, որ երկու որդիներս` Միշան եւ Նիքոլան, մկրտուած են այստեղ` Հայաստանի մէջ` հաւատարիմ մնալով իրենց արմատներուն», – ըսած է Շառլ Ազնաւուր:

«Ես ծնած եմ Ֆրանսա, ուսանած եմ Զուիցերիոյ եւ Գանատայի մէջ, բայց որքան կը մեծնամ, այնքան ուժեղ կը կապուիմ հայկական արմատներուս: Զրուցելով հօրս, հօրաքրոջս հետ, լսելով անոնց պատմութիւնները, ես վերադարձայ ընտանիքիս արմատներուն: Սկսած եմ հայերէն սորվիլ: Այս ամէնէն ետք զգացի, որ կը ցանկանամ մկրտուիլ Հայաստանի մէջ»,- ըսած է Նիքոլայ Ազնաւուր: Ան խոստովանած է, որ Տաթեւի վանքին մէջ մկրտուիլը իր կեանքի անմոռանալի պահերէն մէկն է: