Միացեալ Նահանգներու Ներկայացուցիչներու տան արտաքին յարաբերութիւններու յանձնախումբի նախագահ Էտ Ռոյս յայտնեց, որ Քոնկրեսին պիտի ներկայացուի օրինագիծ մը, որով կը նախատեսուի պատժել այն երկիրները, որոնք նիւթական ու քարոզչական միջոցներով կ՛աջակցին Իսլամ եղբայրներու շարժումի տարբեր թեւերուն, ներառեալ պաղեստինեան Համաս շարժումը եւ «այլ ծայրայեղական խմբաւորումները»:

«Քոնկրեսը պիտի սերտէ Ատիտի (Քաթար, «Ա.») ռազմակայանէն ամերիկեան ուժերը հեռացնելու հարցը, եթէ Քաթար չփոխէ իր վարմունքը», աւելցուց ան: Նշենք, որ Քաթարի օդուժի Ատիտ ռազմակայանը կը նկատուի աշխարհի մէջ ամերիկեան մեծագոյն ռազմակայանը:

Ռոյս յայտարարեց, որ պատշաճ չէ, որ Քաթար ամերիկեան ուժերը հիւրընկալէ եւ միեւնոյն ժամանակ աջակցի ծայրայեղական խմբաւորումներուն` նշելով, որ ինք Քաթարը նկարագրած է իբրեւ Քայիտայի, ՏԱՀԵՇ-ի, Իսլամ եղբայրներ եւ Թալեպան շարժումներուն ֆինանսաւորման նպաստած երկիր մը: