«Սի.Էն.Էն.Թիւրք» հաղորդեց, որ թրքական իշխանութիւնները արտաքին գործոց նախարարութիւն կանչած են Թուրքիոյ մէջ Միացեալ Նահանգներու դեսպանը` բողոքելու համար Թուրքիոյ նախագահ Ռեճեփ Թայիփ Էրտողանի Ուաշինկթըն կատարած այցելութեան ընթացքին թրքական անվտանգութեան աշխատակիցներուն նկատմամբ վատ վերաբերմունքին համար:

Ըստ «Ռոյթըրզ» լրատու գործակալութեան, Թուրքիոյ արտաքին գործոց նախարարութիւնը յայտնած է, թէ Թուրքիոյ մէջ Միացեալ Նահանգներու դեսպան Ճոն Պասի փոխանցուած է «գրաւոր եւ բերանացի բողոք» մը ընդդէմ «դիւանագիտական օրէնքներու եւ գործելաոճին հակասող» վարմունքին: Անգարա «դիւանագիտական այս միջադէպին շուրջ ամբողջական հետաքննութիւն մը» պահանջած է:

Նախարարութիւնը նշեց, որ «ամերիկեան իշխանութիւններուն պաշտօնական ծրագիրի իւրաքանչիւր հանգրուանին բաւարար նախազգուշութիւններ առնելու անկարողութեան պատճառով» ապահովական բացեր ստեղծուած էին` աւելցնելով, որ դէպքերը շուքի պիտի չմատնեն այլապէս «շատ յաջող» այցելութիւնը:

Աւելի ուշ, Միացեալ Նահանգներու արտաքին գործոց նախարարութիւնը մեկնաբանելով այդ լուրը նշեց. «Թրքական անվտանգութեան ծառայութեան անդամներուն Ուաշինկթընի մէջ ունեցած վարուելակերպը շատ նեղացուցիչ էր»: