Ռուսիոյ արտաքին գործոց նախարարութեան բանբեր Մարիա Զախարովա յայտարարեց, որ Ռուսիոյ արտաքին գործոց նախարարութիւնը յայտարարութիւն մը կը պատրաստէ Լեռնային Ղարաբաղի տագնապի լուծման հոլովոյթին վերաբերեալ Ռուսիոյ դիրքորոշումին մասին:

«Ես Լեռնային Ղարաբաղի տագնապի լուծման հոլովոյթի գնահատականին վերաբերեալ մեր ընդարձակ դիրքորոշումը պիտի ներկայացնեմ, որպէսզի հիմա չսահմանափակուինք երկու-երեք ընդհանուր խօսքերով: Ես պիտի պատրաստեմ ընդգրկուն նիւթ մը այդ հարցին վերաբերեալ` մեր բոլոր գնահատականներով, որոնք պիտի ներկայացնեմ կա՛մ Ռուսիոյ արտաքին գործոց նախարարութեան կայքին վրայ, կա՛մ յաջորդ մամլոյ ասուլիսին ընթացքին», ըսած է Զախարովա` պատասխանելով նախորդ տարուան ապրիլեան քառօրեայ պատերազմի տարելիցին եւ այս մէկ տարուան ընթացքին լուծման հոլովոյթին վերաբերեալ Ռուսիոյ արտաքին գործոց նախարարութեան գնահատականին մասին հարցումին:

Խօսելով Մոսկուայի մէջ Հայաստանի եւ Ազրպէյճանի արտաքին գործոց նախարարներու հաւանական հանդիպումին մասին` ան յայտարարեց. «Այս պահուս ես տեղեկութիւն չունիմ Մոսկուայի մէջ Հայաստանի եւ Ազրպէյճանի արտաքին գործոց նախարարներու հանդիպումին վերաբերեալ: Եթէ այդպիսի տեղեկութիւն ըլլայ, ես զայն ձեզի պիտի ներկայացնեմ»: