Թուրքիոյ արտաքին գործոց նախարարութիւնը յայտարարած է, որ Հոլանտայի եւ Թուրքիոյ միջեւ յառաջացած լարուածութեան վերաբերեալ Եւրոպական Միութեան արտաքին քաղաքականութեան յանձնակատար Ֆետերիքա Մոկերինիի եւ Դրացնութեան եւ ընդլայնման հարցերով յանձնակատար Եոհաննէս Հանի «անհեռատես յայտարարութիւնները» Թուրքիոյ համար որեւէ արժէք չեն ներկայացներ:

Թուրքիոյ արտաքին գործոց նախարարը նշած է, թէ Եւրոպական Միութեան յանձնակատարներու յայտարարութեան մէջ սխալ մեկնաբանութիւններ կատարուած են: Թրքական կողմը «անխոհեմ» անուանած է Հոլանտան պատժելու փոխարէն անոր թիկունք կանգնիլը:

Մոկերինի եւ Հան մէկ օր առաջ միացեալ յայտարարութեան մը մէջ անհրաժեշտ նկատած են թուլացնել լարուածութիւնը Թուրքիոյ եւ Եւրոպական Միութեան անդամ շարք մը երկիրներու միջեւ, գտնել ուղիներ կացութիւնը հանդարտեցնելու համար: «Եւրոպական Միութիւնը Թուրքիոյ կոչ կ՛ուղղէ զերծ մնալու աւելորդ յայտարարութիւններէ եւ գործողութիւններէ, որոնք կրնան աւելի լարել կացութիւնը», ըսուած է միացեալ յայտարարութեան մէջ:
�