Թուրքիոյ նախագահ Ռեճեփ Թայիփ Էրտողան, դարձեալ անդրադառնալով Հոլանտայի հետ յարաբերութիւններուն մէջ յառաջացած դիւանագիտական ճգնաժամին, նշած է, որ այդ երկիրը «պանանային հանրապետութեան» պէս կը վարուի եւ պէտք է պատժամիջոցներու ենթարկուի թուրք նախարարները Ռոթերտամի մէջ խօսք արտասանելու իրաւունքէն զրկելուն համար:

«Ռոյթըրզ» լրատու գործակալութիւնը կը հաղորդէ, որ Էրտողան յայտնած է. «Կը դիմեմ Եւրոպայի եւ այլ երկիրներու մէջ գործող միջազգային կազմակերպութիւններուն` կոչ ուղղելով պատժամիջոցներ հաստատելու Հոլանտայի դէմ: Եւրոպան որեւէ ձեւով արձագանգե՞ց այս միջադէպին: Ո՛չ, իսկ ինչո՞ւ: Որովհետեւ անոնք մէկը միւսին չեն խածներ: Հոլանտան պանանային հանրապետութեան պէս կը վարուի»:

Էրտողան նախապէս Հոլանտայի իշխանութիւնները համեմատած էր ֆաշականներու հետ` այս ձեւով բողոքելով Թուրքիոյ արտաքին գործոց նախարար Մեւլութ Չաւուշօղլուի Ռոթերտամ այցելութիւնը արգիլելուն դէմ:

Թուրքիոյ վարչապետ Պինալի Եըլտըրըմ` մեկնաբանելով Պոլսոյ մէջ Հոլանտայի հիւպատոսարանի շէնքէն Հոլանտայի դրօշը վար առնելու եւ թրքական դրօշը բարձրացնելու դէպքը, զայն նկատած է սադրանք եւ քաղաքացիներուն խորհուրդ տուած է խուսափելու այդպիսի գործողութիւններէն:

«Այսուհետեւ պէտք է խուսափիլ այդպիսի քայլերէ», թրքական «ՀապերԹիւրք» կայքին հետ հարցազրոյցի մը ընթացքին ըսած է Եըլտըրըմ:

Միւս կողմէ, «Սփութնիք» լրատու գործակալութեան թրքական ծառայութիւնը կը հաղորդէ, որ թուրք ազգայնական գործիչ, Թուրքիոյ ներքին գործոց նախկին նախարար եւ Ազգայնական շարժում կուսակցութեան նախկին անդամ Մերալ Աքշեներ Թուրքիոյ իշխանութիւններուն կոչ ուղղած է գերմանական զինեալ ուժերուն թրքական «Ինճիրլիք» ռազմակայանին մէջ ներկայութիւնը այլեւս չարտօնելու եւ ստիպելու, որ այնտեղէն հեռացուին գերմանական կործանիչները:

«Կ՛անիծեմ Հոլանտան եւ Գերմանիան, ձեր մտքին եկած ինչքա՛ն վատ բառ կայ` համարեցէք, որ անոնց կ՛ըսեմ», ըսած է նախկին նախարարը, ըստ որուն, Եւրոպայի մէջ «երկու դահեկան»-ի հաւասար դարձուցած են Թուրքիոյ հանրապետութեան պատիւը:

Աքշեներ նաեւ մտահոգութիւն յայտնած է Հոլանտայի եւ Գերմանիոյ մէջ բնակող թուրքերու ճակատագիրին առնչութեամբ, մանաւանդ անոնց, որոնք տակաւին չեն ստացած այդ երկիրներուն քաղաքացիութիւնը:

«Այս բոլորէն ետք, ի՞նչ պիտի ըլլայ այնտեղ ապրող մեր եղբայրներուն: Մենք, իբրեւ թուրք ազգ, կրնանք ցաւէն մեռնիլ, սակայն պիտի պահենք մեր պատիւը», ըսած է ազգայնական գործիչը:

�