Հայաստանի եւ Ռուսիոյ նախագահներ Սերժ Սարգսեանի եւ Վլատիմիր Փութինի հերթական հանդիպումը նախապատրաստական փուլի մէջ է: Մոսկուայի մէջ այս յայտարարութիւնը կատարեց Հայաստանի արտաքին գործոց նախարար Էդուարդ Նալբանդեան` իր ռուս պաշտօնակից Սերկէյ Լաւրովի հետ բանակցութիւններու աւարտին: Այս մասին կը հաղորդէ «Մետիամաքս»:

«Այս պահուն բանակացութիւններ կ՛ընթանան Հայաստանի նախագահի` Ռուսիա պաշտօնական այց կատարելու վերաբերեալ», ըսած է ան:

Լաւրով. «ԵԱՀԿ-ի Մինսքի Խմբակի
Ձեւաչափին Այլընտրանքը Չկայ»

Ռուսիոյ եւ Հայաստանի արտաքին գործոց նախարարները նաեւ կարծիքներ փոխանակեցին Հարաւային Կովկասի իրավիճակին, ներառեալ` Լեռնային Ղարաբաղի տագնապին վերաբերեալ:

Հանդիպումի աւարտին Ռուսիոյ արտաքին գործոց նախարար Սերկէյ Լաւրով Հայաստանի արտաքին գործոց նախարար Էդուարդ Նալբանդեանին հետ տուած միացեալ մամլոյ ասուլիսին ընթացքին յայտարարեց. «Եթէ մենք իսկապէս յանձնառու ենք փոխադարձ ընդունելի լուծում փնտռելու անհրաժեշտութեան վերաբերեալ սկզբունքային համաձայնութիւններուն, ուրեմն համոզուած եմ, որ Մինսքի խմբակի համանախագահներու աշխատանքի ներկայ ձեւաչափը այլընտրանք չունի»:

Ըստ Լաւրովի, համանախագահներու եռեակի առաջատար դերի օգտին բազմաթիւ անգամ հանդէս եկած են թէ՛ Հայաստանի ու Ազրպէյճանի նախագահները, թէ՛ ալ ԵԱՀԿ-ի բոլոր անդամները: «Համանախագահները անգործութեան մատնուած չեն: Ես չեմ կրնար այդպէս որակել այն, ինչ որ ներկայիս այդ եռեակի ծիրին մէջ տեղի կ՛ունենայ: Համանախագահները իրենց եռակողմանի փաստաթուղթերու հիման վրայ, որոնք պարբերաբար տարածուած են իբրեւ ԵԱՀԿ-ի պաշտօնական փաստաթուղթեր, արտայայտուած են բանակցային հոլովոյթի արագացման եւ աշխուժացման օգտին: Վերջին անգամ նման փաստաթուղթը ընդունուած է բառացիօրէն վերջերս` անվտանգութեան հարցերով Միւնիխի խորհրդաժողովի ծիրին մէջ: Այդ փաստաթուղթերը բաց են եւ առանց երկիմաստութեան կը խօսին այդ ձեւաչափով եւ այդ սկզբունքներուն համահունչ աշխատելու անհրաժեշտութեան մասին, որոնց շուրջ համանախագահներու աջակցութեամբ կողմերը համաձայնութիւն գոյացուցած են», ըսաւ Լաւրով:

«Ռուսիան հանդէս կու գայ այդ հակամարտութեան փոխադարձ ընդունելի լուծման փնտռտուքը շարունակելու օգտին` այն փաստաթուղթերու հիման վրայ, որոնք վերջին տարիներուն ստորագրուած են Հայաստանի եւ Ազրպէյճանի նախագահներու եւ ԵԱՀԿ-ի Մինսքի խմբակի երեք համանախագահ երկիրներու ղեկավարներուն մասնակցութեամբ», ըսած է Լաւրով:

«Ընդհանուր առմամբ, ես վստահ եմ, որ բանակցութիւնները պիտի նպաստեն մեր բարեկամական դաշնակցային յարաբերութիւններու հետագայ զարգացման», աւելցուց ան:

�