«Հիւրրիյէթ» օրաթերթի թղթակից Ապտուլքատիր Սելվին կը գրէ, որ Միացեալ Նահանգներու զինեալ ուժերու սպայակոյտներու ղեկավարներու միացեալ կոմիտէի ղեկավար Ճոզըֆ Տանֆըրտի եւ Թուրքիոյ զինեալ ուժերու սպայակոյտի պետ Հուլուսի Աքարի` վերջերս թրքական «Ինճիրլիք» ռազմակայանին մէջ տեղի ունեցած հանդիպումին ընթացքին յստակ համաձայնութիւն մը չէ գոյացած սուրիական Ռաքքա քաղաքին մէջ իրականացուելիք զինուորական գործողութեան միացեալ ծրագիրի շուրջ:

Լրագրողը կը պնդէ, որ հանդիպումին ընթացքին Տանֆըրտ առաջարկած է, որ Միացեալ Նահանգներու կողմէ աջակցութիւն վայելող քրտական ուժերը, մասնակցելով ՏԱՀԵՇ-էն Ռաքքայի ազատագրման գործողութեան, Միջազգային դաշինքի ուժերուն միանան հարաւային կողմէն, իսկ Թուրքիոյ կողմէ աջակցութիւն վայելող Սուրիական ազատ բանակի զինեալները` հիւսիսէն, ասոր իբրեւ հետեւանք կարելի պիտի ըլլայ խուսափիլ վերջիններուս միջեւ անցանկալի բախումէն:

Մինչդեռ թրքական կողմը, ըստ պնդումներուն, չէ հրաժարած քիւրտերը Ռաքքայի գործողութենէն դուրս մղելու իր մտադրութենէն:

Նախապէս Թուրքիոյ պաշտպանութեան նախարար Ֆիքրի Ըշըք շեշտած էր, որ Թուրքիան խիստ մտահոգուած է Ռաքքայի ազատագրման հարցին մէջ «սխալ դերակատարներու» ընտրութեան խնդիրով:

�