Գերմանական ոստիկանութիւնը խուզարկեց տուները չորս իմամներու, որոնք ամբաստանուած են Թուրքիոյ հաշուոյն լրտեսութիւն կատարելու յանցանքով:

Չորս իմամները ամբաստանուած են իսլամ թուրք քարոզիչ Ֆեթհուլլա Կիւլենի հետեւորդները լրտեսելու յանցանքով: Գերմանական «Շփիկըլ» կայքը կը հաղորդէ, որ նշեալ իմամները կը պատկանին կրօնական հարցերու թուրք իսլամական միութեան, որ Գերմանիոյ թուրք համայնքի մեծագոյն կազմակերպութիւնն է, ուղղակիօրէն կապուած է Անգարայի եւ կը վերահսկէ Գերմանիոյ մէջ 900 մզկիթներու կամ կրօնական խմբաւորումներու աշխատանքին:

Գերմանական իշխանութիւնները կը կարծեն, որ նշեալ չորս իմամները իրենց լրտեսական գործունէութեան սկսած են ստանալէ ետք ուղղակիօրէն Թուրքիոյ վարչապետի գրասենեակին կապուած կրօնական հարցերու բաժանմունքէն 20 սեպտեմբեր թուակիր ցուցմունքը, որուն մէջ Կիւլենը ամբաստանուած է Թուրքիոյ մէջ զինուորական յեղաշրջում փորձած ըլլալու յանցանքով:

�