Սպիտակ տան բանբեր Շան Սփայսըր յայտարարեց, որ Միացեալ Նահանգներու նախագահ Տանըլտ Թրամփ կ՛ակնկալէ, որ Խրիմը դարձեալ յայտնուի Ուքրանիոյ կազմին մէջ:

«Նախագահ Թրամփ շատ յստակ հասկցուցած է, թէ Ռուսիոյ կառավարութենէն կը սպասէ Ուքրանիոյ մէջ տիրող իրավիճակի կայունացում եւ Խրիմի վերադարձ», ըսած է Սփայսըր` մեկնաբանելով Թրամփի Ազգային անվտանգութեան խորհրդական Մայքըլ Ֆլինի պաշտօնէն հեռացումը, որուն պատճառը եղած է Ռուսիոյ դեսպանին հետ անոր ունեցած կապը:

Սփայսըր ընդգծեց, որ Ռուսիոյ դէմ պատժամիջոցներու Ուաշինկթընի ռազմավարութիւնը կը մնայ հաստատ:

Միացեալ Նահանգներու ելեւմուտքի նախարար Սթիվըն Մանուշին իր կարգին յայտնեց, որ Ռուսիոյ դէմ պատժամիջոցներու քաղաքականութիւնը պիտի շարունակուի` աւելցնելով. «Պատժամիջոցներու ծրագիրը, որ ներկայիս կը կիրարկուի, պիտի մնայ ի զօրու, որովհետեւ պատժամիջոցները կարեւոր մեքանիզմ մըն են, եւ մենք կը շարունակենք զայն նկատի ունենալ տարբեր երկիրներու դէմ կիրարկելու համար»:

Միւս կողմէ, Ռուսիոյ արտաքին գործոց նախարարութեան բանբեր Մարիա Զախարովա երէկ յայտարարեց. «Խրիմը Ուքրանիոյ վերադարձնելու հարցը ամբողջովին բացառուած է»: «Ռուսիան իր հողերու որեւէ մէկ մասէն պիտի չհրաժարի», նշեց ան:

�