Պոլսահայ լրագրող Հրանդ Տինքի սպանութեան գործով կասկածեալ՝ Սթամպուլի ոստիկանութեան հետախուզական բաժինի նախկին տնօրէն Ալի Ֆուաթ Եըլմազերը, դատական նիստին ժամանակ նոր ցուցմունքներ տուած է գործին վերաբերեալ: Ան յայտարարած է, որ պետութիւնը որեւէ քայլ չէ ձեռնարկած Տինքը պաշտպանելու համար: Այս մասին կը տեղեկացնէ պոլսահայ «Ակօս» թերթը։

«Այս յանցագործութեան հետ կապուած հետաքննութիւններ իրականացած են, սակայն ոչ մէկ քայլ ձեռնարկուած է: Ասիկա յանցագործութիւն մըն է, ուր բոլորը, ընդհանուր յայտարարի գալով, որեւէ միջոց չձեռնարկեցին եւ թոյլ տուին, որ անիկա տեղի ունենայ: Պետութիւնը չըրաւ այն, ինչ պարտաւոր էր: Հրանդ Տինքի կեանքը չպաշտպանուեցաւ»,-­ նշած է Եըլմազերը:

Կասկածեալը ըսած է, որ յանցագործութեան կատարումը նպատակ ունեցած է Թուրքիոյ մէջ անկայունութիւն ստեղծել: «Արդարութիւն եւ զարգացում» կուսակցութեան՝ իշխանութեան օրով ազգայնականները համակարգուած կերպով յաճախակիացուցած են իրենց գործողութիւնները: Տինքի սպանութիւնը պիտի ծառայէր քաոսի յառաջացման»,­- յայտնած է Սթամպուլի ոստիկանութեան հետախուզական բաժինի նախկին տնօրէնը:

Ան ընդունած է այն փաստը, որ Տինքի կեանքը պաշտպանելը եղած է Սթամպուլի իշխանութիւններուն պարտականութիւնը: Եըլմազեր յայտնած է, որ Սթամպուլի նահանգապետարանն ու ոստիկանութիւնը տեղեկութիւններ ունեցած են Տինքի սպանութիւնը նախապատրաստելուն վերաբերեալ, սակայն անոր անհրաժեշտ պաշտպանութիւն չէ տրամադրուած: «Եթէ սպանութեան գործով կ՝որոնուի կանխամտածուածութեան տարր, ատիկա պէտք է փնտռել Սթամպուլի մէջ»,-­ նշած է ան:

Յիշեցնենք, որ Սթամպուլի «Ակօս» թերթի հայ խմբագրապետ Հրանդ Տինքը սպաննուած է 2007 Յունուար 19­-ին` խմբագրութեան առջեւ անոր վրայ կատարուած զինուած յարձակման հետեւանքով:

�