Շաբաթ, 14 յունուար 2017-ի առաւօտուն վեհափառ հայրապետին այցելեց հայ կաթողիկէ համայնքին հոգեւոր տէրը: Հանդիպման ներկայ էին Թեհրանի հայոց թեմի առաջնորդ Սեպուհ արք. Սարգիսեան, Բերիոյ հայոց թեմի առաջնորդ Շահան արք. Սարգիսեան, Թորգոմ Ծ. վրդ. Տօնոյեան եւ հոգեւոր տիրոջ ընկերացող չորս բարձրաստիճան հոգեւորականներ:

Հոգեւոր տէրը յատուկ պատուիրակութեամբ մը եկած էր շնորհաւորելու Արամ Ա. վեհափառ հայրապետը Սուրիա կատարած իր այցելութեան համար: Այս առիթով հայ կաթողիկէ պատրիարքը Հալէպի վերականգնումին եւ վերաշինութեան գծով իր եւ իր համայնքին ամբողջական զօրակցութիւնը եւ մասնակցութիւնը խոստացաւ Արամ Ա. կաթողիոսին:

Հանդիպման ընթացքին յատուկ զեկուցումով հանդէս եկան Բերիոյ հայոց թեմի առաջնորդ սրբազան հայրը եւ Հալէպի հայ կաթողիկէ համայնքի առաջնորդ Պետրոս արք. Միրիաթեանը, որոնք նախ իրենց երախտագիտութիւնը յայտնեցին Արամ Ա. կաթողիկոսին, մասնաւորաբար Հալէպ կատարած իր գօտեպնդող այցելութեան համար, եւ խօսեցան վեհափառ հայրապետին վերականգնումի կոչէն բխող գործնական առաջարկներուն եւ կատարուելիք աշխատանքներուն մասին:

Թէ՛ վեհափառ հայրապետը եւ թէ՛ հոգեւոր տէրը իրենց լաւատես ու դրական հեռանկարները պարզեցին Հալէպի վերականգնումին ու վերաշինութեան գծով եւ թելադրեցին հոգեւոր հայրերուն զանազան բարեսիրական միութիւններու օժանդակութիւնը ապահովել ընդհանրապէս Սուրիոյ եւ ի մասնաւորի Հալէպի վերաշինութեան համար:

�