Թուրքիոյ արտաքին գործոց նախարար Մեւլութ Չաւուշօղլու շեշտեց, որ քաղաքայինները դուրս բերելու համար կարեւոր է Հալէպի մէջ զինադադարի համաձայնութիւն գոյացնել:

Ան ըսաւ, որ սուրիական վարչակարգն ու անոր աջակցող կողմերը պատասխանատու են Հալէպի մէջ արձանագրուող իրադարձութիւններուն:

Թրքական դիւանագիտութեան պետը յայտարարեց, որ Թուրքիան լուռ պիտի չմնայ Հալէպի մէջ տեղի ունեցող անիրաւութեան նկատմամբ:

Միւս կողմէ, թուրք բարձրաստիճան պաշտօնատար մը «Ռոյթըրզ» լրատու գործակալութեան յայտնած է, որ թուրք եւ ռուս պաշտօնատարներ այսօր Թուրքիոյ մէջ պիտի գումարեն ժողով մը` քննարկելու համար Հալէպի մէջ տիրող կացութիւնը:

«Ժողովը պիտի քննարկէ զինեալներու եւ քաղաքայիններու հեռացման միջանցքներու բացման եւ զինադադարի հաստատման կարելիութիւնը», նշած է թուրք պաշտօնատարը` աւելցնելով. «Թուրքիա կը շարունակէ ամերիկեան իշխանութիւններուն, ինչպէս նաեւ Իրանի, Եւրոպական Միութեան եւ Ծոցի երկիրներուն հետ ընդդիմադիր խմբաւորումներու զինեալները Հալէպէն դուրս բերելու շուրջ իր ջանքերը»:

Ռուսիոյ արտաքին գործոց նախարար Սերկէյ Լաւրով յայտնեց, որ «կարելի էր զինեալները սեպտեմբերին արդէն Հալէպէն դուրս բերել, սակայն Ուաշինկթըն այդ ուղղութեամբ ոչինչ ըրաւ»` նշելով. «Զինեալները Հալէպի մէջ զինադադարի համաձայնութիւնը չստորագրեցին»:

«Արեւմուտքը անկարող է վերահսկել անոնք, որոնք ծայրայեղականներուն կ՛աջակցին», ըսաւ Լաւրով:

«Թուրքիոյ հետ աշխուժ հաղորդակցութիւն ունինք» նշեց ան:

�