Թուրքիոյ վարչապետ Պինալի Եըլտըրըմ թրքական պետական «Թէ.Ռէ.Թէ.» պատկերասփիւռի կայանին հետ հարցազրոյցի մը ընթացքին զգուշացուց. «Առանց Թուրքիոյ օժանդակութեան Եւրոպան կրնայ գաղթականներու ալիքներով ողողուիլ»: «Եւրոպական Միութեան հետ բանակցութիւններու խզումը Եւրոպայի համար աւելի վնասակար պիտի ըլլայ, քան Թուրքիոյ», ընդգծեց ան:

«Մենք Եւրոպան պաշտպանող ազդակներէն մէկն ենք: Եթէ գաղթականներուն արտօնուի անցնիլ, ապա պիտի հոսին ու ներխուժեն Եւրոպա. Թուրքիան ատոր արգելք կը հանդիսանայ», նշեց Եըլտըրըմ:

«Կ՛ընդունիմ, որ Եւրոպայի հետ յարաբերութիւններու խզումը վնաս պիտի պատճառէ Թուրքիոյ, սակայն Եւրոպային հինգ կամ վեց անգամ աւելի վնաս պիտի պատճառէ», ըսաւ Թուրքիոյ վարչապետը:

Ան անգամ մը եւս մեղադրեց Եւրոպան Թուրքիոյ մէջ իբրեւ ահաբեկչական ճանչցուած Քրտական աշխատաւորական կուսակցութեան (ՔԱԿ) եւ 15 յուլիսի յեղաշրջման փորձի գլխաւոր կազմակերպիչ նկատուող թուրք իսլամ քարոզիչ Ֆեթհուլլա Կիւլենի «Հիզմեթ» շարժումին աջակցելու համար:

«Գոյութիւն ունին Եւրոպական Միութիւնը թունաւորող երկու խմբաւորումներ` կիւլենականներն ու ՔԱԿ-ը», ըսաւ Եըլտըրըմ:

Մէկ օր առաջ Եւրոպական խորհրդարանը 479 թեր, 37 դէմ եւ 107 ձեռնպահ քուէներով որդեգրած էր Թուրքիոյ` Եւրոպական Միութեան անդամակցութեան շուրջ բանակցութիւններու սառեցման մասին որոշում մը:

Նշենք, որ Անգարան Եւրոպական Միութեան անդամակցութեան դիմում ներկայացուցած է 1987-ին, իսկ անդամակցութեան բանակցութիւնները սկսած են 2005-ին:

Թրքական «Ճումհուրիյէթ» օրաթերթը կը հաղորդէ, որ Թուրքիոյ նախագահ Ռեճեփ Թայիփ Էրտողան իր կարգին սպառնացած է Եւրոպա ուղարկել Թուրքիա գտնուող 3 միլիոն գաղթականները:

«3-3,5 միլիոն գաղթական այս երկրին մէջ կերակրողը մենք ենք, ծովու ափերուն խեղդուած մանուկներու մարմինները հաւաքողը մենք ենք, դուք ձեր խօսքը չպահեցիք: Երբ 50 հազար գաղթական հասաւ Քափըքուլէ (թուրք-պուլկարական սահման), սկսեցաք լալ, թէ ի՞նչ պիտի ըլլայ, եթէ Թուրքիան բանայ Քափըքուլէի դռները: Եթէ այսպէս շարունակէք` գիտցէ՛ք, որ Թուրքիան ալ ճիշդ այդպէս պիտի ընէ», յայտարարած է Էրտողան:

�