Մինչ Սուրիոյ հարցով ՄԱԿ-ի յատուկ պատուիրակ Սթեֆան տը Միսթուրա յայտարարեց, որ արեւելեան Հալէպի մէջ ինքնակառավարումը պէտք է շարունակուի, եթէ զինեալները անկէ հեռանան, Սուրիոյ արտաքին գործոց նախարար Ուալիտ Մոալլեմ տը Միսթուրայի հետ իր հանդիպումէն ետք յայտնեց, որ արեւելեան Հալէպի մէջ ինքնակառավարման գաղափարը ամբողջովին մերժելի է:

Ան ըսաւ, որ Տը Միսթուրա միջսուրիական երկխօսութեան վերսկսման թուական մը չէ ճշդած` աւելցնելով. «Թերեւս ամերիկեան նոր վարչակազմին կամ ՄԱԿ-ի նոր ընդհանուր քարտուղարին կը սպասէ որեւէ քայլի դիմելու համար»:

Մոալլեմ ըսաւ, որ Սուրիոյ մէջ ՄԱԿ-ի դերակատարութեան այլընտրանքը գոյութիւն չունի, սակայն պայմանով, որ վերջինս «իր անդամներուն գերիշխանութիւնը յարգէ»:

Սուրիական դիւանագիտութեան պետը յայտնեց, որ Ուաշինկթըն Ռաքքա հասնելէ առաջ կ՛օգտագործէ քիւրտերը, որմէ ետք ալ պիտի օգտագործէ Թուրքիան: Ան վերահաստատեց, որ իր երկիրը կը մերժէ, որ նոյնիսկ մէկ թուրք զինուոր մնայ սուրիական հողերուն վրայ:

Խօսելով Միացեալ Նահանգներու նորընտիր նախագահ Տանըլտ Թրամփէն ակնկալիքներուն մասին` Մոալլեմ ըսաւ, որ Դամասկոս ամերիկեան նոր վարչակազմէն սպասածը ահաբեկչական խմբաւորումներուն կասեցումը չէ, այլ ահաբեկչութեան աջակցող երկիրներու զսպումը:

Պատասխանելով եգիպտացի լրագրողի մը Սուրիա-Եգիպտոս յարաբերութիւններուն մասին այն հարցումին, թէ «սուրիական-եգիպտական գնացքը հասա՞ւ յուսալի կանգառ», Սուրիոյ արտաքին գործոց նախարարը ըսաւ, որ Սուրիոյ տագնապին վերաբերեալ եգիպտական յայտարարութիւնները յառաջդիմութիւն արձանագրած են, «սակայն տակաւին չեն հասած մեր սպասածին»:

«Մնացած է փոքր ոստում մը, եւ հարցերը իրենց բնական հունին կը վերադառնան», ըսաւ ան:

�

�