Պոլսոյ Մխիթարեան վարժարանի պատին յայտնուած ցեղապաշտական գրութեան առնչութեամբ յայտարարութիւն տարածած են «Նոր Զարթօնք» նախաձեռնութեան հեղինակները, որոնք նշած են, որ չեն վախնար ազգայնականներուն սպառնալիքներէն: «Արմէնփրես» կը հաղորդէ, որ անոնք այս մասին գրառում կատարած են Դիմատետրի վրայ:

«Պոմոնթի Մխիթարեան դպրոցի պատին երէկ առաւօտեան գրութիւն մը տեսանք: Դժբախտաբար, ականատեսը կը դառնանք այն բանին, թէ ինչպէ՛ս ամէն անցնող օրուան հետ կ՛աւելնայ հայերու դէմ ուղղուած ատելութեան խօսքը: Սակայն մենք չենք վախնար, չենք մեկնիր, այստեղ ենք: Եղած ենք, կանք ու պիտի ըլլանք», յայտարարած են անոնք:

«Ակօս» կը հաղորդէ, որ Պոլսոյ Պոմոնթի շրջանին մէջ գտնուող Մխիթարեան վարժարանի պատին թուրք ազգայնականները գրած են. «Գիշեր մը յանկարծակի պիտի յայտնուինք Ղարաբաղի մէջ»:

Յիշեցնենք, որ օգոստոսին նմանօրինակ գրութիւն յայտնուած էր Սկիւտարի Ս. Խաչ դպրեվանքի, իսկ սեպտեմբերին` Քալֆայեան հայկական դպրոցի պատերուն:

�