ՀՀ նախագահի նստավայրին մէջ այսօր տեղի ունեցած պարգեւատրման հանդիսաւոր արարողութեան ժամանակ իրենց պարգեւները ստացան Տեղեկատուական արհեստագիտութիւններու ոլորտի ՀՀ նախագահի 2016 թուականի կրթական պարգեւներու արժանացած ուսանողներն ու աշակերտները:

Կրթական պարգեւներու յանձնման արարողութեան ժամանակ ելոյթով հանդէս եկած է ՀՀ նախագահը` նշելով. «Ես ուրախ եմ ոչ միայն ձեզ համար: Ուրախ եմ ձեր ուսուցիչների, ձեր դասախօսների, ձեր հարազատների, մեր ողջ հասարակութեան համար, որովհետեւ սա ինչ-որ տեղ ընդգծում է, որ մենք ճիշտ ճանապարհով ենք առաջ շարժւում»:

Կը ներկայացնենք նախագահ Սերժ Սարգսեանի ելոյթը ամբողջութեամբ.

Սիրելի՛ ուսանողներ, աշակերտներ,
Յարգելի՛ տիկնայք եւ պարոնայք,

Ուզում եմ մէկ անգամ եւս շնորհաւորել ձեզ Նախագահի տեղեկատուական տեխնոլոգիաների ոլորտում Հայաստանի Հանրապետութեան կրթական պարգեւներին արժանանալու կապակցութեամբ: Նախագահի հաճելի պարտականութիւններից մէկը պարգեւներ յանձնելն է, բայց այս պարագայում` ինձ համար սա կրկնակի հաճոյք է, որովհետեւ նախ պարգեւների են արժանանում երիտասարդ մարդիկ, ովքեր վաղը կերտելու են Հայաստանը, ապա նաեւ` սա այն ոլորտն է, որը Հայաստանի համար շատ կարեւոր ու հեռանկարային է: Ես ուրախ եմ ոչ միայն ձեզ համար: Ուրախ եմ ձեր ուսուցիչների, ձեր դասախօսների, ձեր հարազատների, մեր ողջ հասարակութեան համար, որովհետեւ սա ինչ-որ տեղ ընդգծում է, որ մենք ճիշտ ճանապարհով ենք առաջ շարժւում: Վաղուայ Հայաստանը պէտք է լինի աւելի կրթուած, ժամանակի հետ համընթաց քայլող եւ բանիմաց ու ստեղծագործ քաղաքացիների ձեռքում: Վաղուայ Հայաստանը պէտք է լինի զարգացած տեղեկատուական աշխարհի տիրոյթում: Մենք այլ ճանապարհ չունենք: Այս ճանապարհը փորձուած ճանապարհ է: Հազարամեակների ընթացքում մեր ժողովուրդը մշտապէս տեսել, ընկալել եւ ընդունել է առաջաւորը, տեղայնացրել ու նաեւ սրա շնորհիւ է, որ կարողացել է յարատեւել, եւ մենք պէտք է այս ճանապարհը շարունակենք:

Սիրելի՛ երիտասարդներ,

Ձեր յաջողութիւնները մեզ լաւատեսութիւն եւ ուրախութիւն են պարգեւում: Եղէ՛ք աւելի նախաձեռնող, շատ համարձակ ձեր նախաձեռնութիւններում եւ յամառ` կրթութեան մէջ: 21-րդ դարը շատ արագ է զարգանում: Մենք այսօր ապրում ենք արագ զարգացող աշխարհում: Մենք ձեր տարիքում չգիտէինք, թէ ինչպիսի՞ մասնագիտութիւններ են լինելու զարգացած տեխնոլոգիաների, համացանցի դարաշրջանում: Նոյնն էլ լինելու է 20-30 տարի յետոյ: Դրան պէտք է պատրաստ լինել, եւ վստահ եմ, որ դուք պատրաստ էք լինելու:

մէկ անգամ եւս շնորհաւորում եմ եւ շնորհակալութիւն եմ յայտնում ձեր ծառայութեան համար, իսկ սա ծառայութիւն է: Հաստատ իմացէք` լաւ սովորելը, յաջողութիւն ունենալը ծառայութիւն է երկրին: Ուզում եմ շնորհակալութիւն յայտնել այս մրցանակաբաշխութեան կազմակերպիչներին: Շատ շնորհակալ եմ: Ի հարկէ, նաեւ շնորհակալութիւն եմ յայտնում մրցութային յանձնաժողովին:

�

�