Թրքական «Հիւրրիյէթ» օրաթերթը կը հաղորդէ, որ Իրաքի վարչապետ Հայտար Ապատի հանդիպում ունեցած է իր երկրին մէջ օտարերկրեայ առաքելութիւններու ներկայացուցիչներուն հետ` ի թիւս այլ հարցերու անդրադառնալով նաեւ Թուրքիոյ հետ յարաբերութիւններուն:

«Ես լաւատես չեմ Իրաքի հարցին մէջ Թուրքիոյ դիրքորոշումէն եւ յատկապէս իրավիճակի հաւանական լարումէն: Մենք կը նախազգուշացնենք Թուրքիան հեռուն չերթալ Իրաքի գերիշխանութիւնը խախտելու հարցին մէջ», ըսած է Իրաքի վարչապետը:

Ան ընդգծած է, որ Թուրքիան իր ներքին խնդիրները դուրս հանելու համար որդեգրած է Սատտամ Հիւսէյնի քաղաքականութիւնը: «Մենք պաշտօնապէս չենք արտօնած թրքական զօրքերուն ներկայութիւնը Իրաքի տարածքին մէջ: Պահանջած ենք, որ յարգեն Իրաքի գերիշխանութիւնն ու անմիջապէս հեռացնեն զինուորները երկրին հիւսիսէն: Թուրք զինուորներուն մնալը պիտի վնասէ երկու երկիրներու պատմական յարաբերութիւններուն», ըսած է Ապատի:

Անդրադառնալով Էրտողանի կողմէ ուղղուած այն մեղադրանքին, թէ Իրաքի քիւրտերը դատապարտուած են ձուլման, վարչապետը հարցուցած է, թէ արդեօք Թուրքիոյ քիւրտերուն տրուա՞ծ են զինուորական եւ քաղաքական իրաւունքներ:

Իրաքի արտաքին գործոց նախարարութեան բանբեր Ահմետ Ժամալ յայտարարեց. «Թրքական պաշտօնական պատուիրակութիւնը, որ երէկ իր երկրին ուժերուն իրաքեան հողամասերէն հեռացման շուրջ բանակցելու համար եկաւ Պաղտատ, այդ առնչութեամբ գաղափարներ ներկայացուց»:

Ան նշեց, որ թրքական պատուիրակութեան ներկայացուցած այդ առաջարկները «չէին համապատասխաներ Իրաքի պահանջներուն եւ ակնկալութիւններուն: Թուրքիոյ Հանրապետութիւնը պէտք է յարգանք ցուցաբերէ Իրաքի գերիշխանութեան նկատմամբ եւ իր զինուորները հեռացնէ Պաաշիքայի ճամբարէն»:

Ժամալ շեշտեց, որ Իրաք Մուսուլի ազատագրման գործողութեան մէջ կը վստահի իր ազգային ուժերուն եւ որեւէ օտար ուժի օգնութեան կարիքը չունի:

Իրաքի արտաքին գործոց նախարարութիւնը մէկ օր առաջ յայտարարած էր, որ թրքական պատուիրակութիւնը Պաղտատ կ՛այցելէ թրքական կողմի խնդրանքով:

Միւս կողմէ, լրատուամիջոցներ հաղորդեցին, որ հազարաւոր իրաքցիներ Սատըրական շարժումի ղեկավար Մուքթատա Սատըրի հրաւէրով բողոքի ցոյց մը կատարեցին Պաղտատի մէջ Թուրքիոյ դեսպանատան առջեւ` պահանջելով թրքական ուժերու Իրաքէն հեռացումը:

Թուրքիոյ վարչապետ Պինալի Եըլտըրըմ երէկ յայտարարեց, որ թրքական ուժերը մասնակցած են Մուսուլի գործողութեան ծիրին մէջ օդային հարուածներուն: Արդարութիւն եւ բարգաւաճում կուսակցութեան ժողովի ընթացքին այս յայտարարութիւնը կատարելէ ետք, Եըլտըրըմ ժողովի վերջաւորութեան սրահը լքելէ առաջ յայտարարած է, որ թրքական օդուժը առայժմ այդպիսի գործողութիւն չէ կատարած:

�