Միացեալ Նահանգներու արտաքին գործոց նախարարութեան բանբեր Մարք Թոնըր յայտարարեց, որ «Ուաշինկթըն Սուրիոյ մէջ զինուորական լուծումի չգոյութեան կը հաւատայ»` աւելցնելով, որ անհրաժեշտ է Սուրիոյ մէջ մարտական գործողութիւններու դադրեցման ճամբով հասնիլ քաղաքական փոխանցման հոլովոյթի մը:

Թոնըր յայտարարեց. «Սուրիոյ մէջ Միացեալ Նահանգներու նպատակը թշնամական գործողութիւններու դադրեցման վերականգնումն է եւ չափաւորական ընդդիմութեան հետ գործելը»:

Ան Սուրիոյ կառավարութիւնը ամբաստանեց «վերջին շրջանին զինադադարները խախտելու» յանցանքով` նշելով, որ Ուաշինկթընի եւ Մոսկուայի միջեւ սուրիական թղթածրարին շուրջ տեղի ունեցած են քննարկումներ, սակայն համաձայնութիւններ չեն գոյացած, այլ` քաղաքական լուծումի հասնելու համար քաղաքական փոխադարձ հասկացողութեան հասնելու փորձեր կատարուած են:

Թոնըր նշեց, որ Միացեալ Նահանգներ տեղեակ չէր Հալէպի դէմ յարձակում գործելու եւ քաղաքայինները շրջափակելու Ռուսիոյ ծրագիրներէն:

Ռուսիոյ արտաքին գործոց փոխնախարար Սերկէյ Ռիապքով երէկ յայտարարեց. «Ռուսիա Հալէպի դէմ յարձակում կամ օդային հարուածներ չի ծրագրեր»:

�