Ազրպէյճանական «Թուրան» լրատու գործակալութիւնը կը հաղորդէ, որ Ազրպէյճանի նախագահ Իլհամ Ալիեւ խումբ մը զինուորականներու առջեւ իր արտասանած խօսքին ընթացքին յայտնած է. «Ազրպէյճանական կողմը մասնակցած է բանակցութիւններուն` չընդունելով որեւէ պայման: Վիեննայի հանդիպումը տեղի ունեցած է Միացեալ Նահանգներու նախաձեռնութեամբ: Կը գտնեմ, որ ատիկա դրական արդիւնքներ ունեցած է: Այսինքն, հայկական կողմի յառաջ քշած պայմանները չեն ընդունուած: Վիեննայի մէջ ազրպէյճանական կողմը ոչ մէկ փաստաթուղթ ստորագրած է: Ուղղակի համանախագահող երկիրները կատարած են յայտարարութիւն մը, ատիկա իրենց յայտարարութիւնն է:

«Մենք դրական կը գնահատենք Ս. Փեթերսպուրկի հանդիպումը: Մենք բանակցութիւններու կ՛երթանք` չընդունելով որեւէ պայման: Ս. Փեթերսպուրկի մէջ քննարկուած է ԵԱՀԿ-ի նախագահի անձնական ներկայացուցիչի գրասենեակի 6 աշխատակիցներուն թիւը 2-2,5 անգամ մեծցնելու հարցը: Այստեղ խօսք չկայ մեծ առաքելութեան մասին: Չի փոխուիր նաեւ գրասենեակին լիազօրութիւնը: Ինչ կը վերաբերի հայերուն կողմէ յառաջ քշուած միջադէպերու հետաքննութեան մեքանիզմին, եթէ իմաստը այն է, որ տագնապը սառեցուի եւ որոշ լրացուցիչ միջոցներ ձեռնարկուին շփման գիծին վրայ, ապա Ազրպէյճանը, ի հարկէ, ատոր պիտի չդիմէ: Ատիկա կարելի է այն պարագային, եթէ բանակցային հոլովոյթին մէջ դրական ընթացքը շարունակուի, մենք շօշափելի արդիւնքներ տեսնենք: Այդ ժամանակ, ի հարկէ, կրնան տարբեր մեքանիզմներ մշակուիլ, ինչպէս նաեւ կրնայ քննարկուիլ այդ հարցը:

«Ազրպէյճանական կողմը եւ անձամբ ես բազմիցս ըսած ենք, որ մենք կրնանք տուեալ տագնապը լուծել կարգաւորել միայն փուլային ճանապարհով, որովհետեւ այլ ձեւ կարելի չէ: Ինչ կը վերաբերի Լեռնային Ղարաբաղի կարգավիճակին, ապա ատիկա ապագայի գործ է: Ի հարկէ, որոշակի կարգավիճակ կրնայ ըլլալ: Ազրպէյճանի կազմին մէջ գոյութիւն ունի Նախիջեւանի Ինքնավար Հանրապետութիւն: Անիկա ունի ինքնավարութեան կարգավիճակ: Եւրոպայի մէջ, այլ երկիրներու մէջ կան յառաջդիմական եւ տարբեր կարգավիճակներ: Սակայն, այդ կարգավիճակը պէտք չէ խախտէ մեր երկրին տարածքային ամբողջականութիւնը»:

�