Միացեալ Նահանգներու արտաքին գործոց նախարար Ճոն Քերրի Մոսկուա իր այցելութեան երկրորդ ու վերջին օրուան ընթացքին հանդիպում ունեցաւ Ռուսիոյ նախագահ Վլատիմիր Փութինի հետ: Վերջինս յոյս յայտնեց, որ Քերրիի այցելութիւնը նպաստէ երկու երկիրներու տեսակէտներու մերձեցման: Ան ըսաւ, որ այն յառաջդիմութիւնը որ տեղի ունեցաւ Սուրիոյ մէջ, շնորհիւ Միացեալ Նահանգներու նախագահ Պարաք Օպամային էր:

Քերրի իր կարգին յայտնեց, որ զինադուլի հաստատումին իբրեւ արդիւնք Սուրիոյ մէջ բռնարարքները նահանջ արձանագրեցին: Ան ըսաւ, որ իր երկիրը Սուրիոյ մէջ քաղաքական փոխանցման շուրջ լուրջ ու դժուար աշխատանքի սկսելու վրայ է:

«Շատեր Սուրիոյ մէջ զինադուլի հաստատումը նկատեցին անկարելի, սակայն շնորհիւ ռուս-ամերիկեան ջանքերուն իրականացաւ», ըսաւ Քերրի:

Նախքան Փութինի հետ հանդիպումը, Քերրի չորս ժամ տեւողութեամբ հանդիպում ունեցաւ իր ռուս պաշտօնակից Սերկէյ Լաւրովի հետ:Ռուսիոյ արտաքին գործոց նախարարութիւնը յայտնեց, որ հանդիպումին ընթացքին քննարկուած են երկկողմանի յարաբերութիւններն եւ անոնց բոլոր բարդ կէտերը:

�